“Liverpul”un baş məşqçi postuna daha iki namizəd bəlli olub

“Liverpul” gələcəkdə baş məşqçi dəyişikliyi baş verəcəyi halda “Kristal Pelas”ın çalışdırıcısı Oliver Qlasneri mümkün namizədlər siyahısına daxil edib.

Sport1.az xəbər verir ki, Caught Offside-ın məlumatına görə, mersisaydlıların rəhbərliyi avstriyalı mütəxəssisi komandanın yaxın perspektiv üçün real seçimi kimi görür. Klub daxilində Qlasnerin kollektivə sabitlik gətirərək rəqabət qabiliyyətini qoruyacağı düşünülür.

“Liverpul” uzunmüddətli strategiya çərçivəsində PSJ-nin baş məşqçisi Luis Enrikeni də nəzərdən keçirir. İspan mütəxəssis “qalib ruhuna sahib, egoist futbolçuları idarə etməyi bacaran və hücum futboluna sadiq” çalışdırıcı kimi xarakterizə olunur.

Qeyd edək ki, Premyer Liqada 15 turdan sonra “Liverpul” 23 xal toplayaraq turnir cədvəlində 10-cu pillədə qərarlaşıb.