Səudiyyə klubları Salah transferi üçün rəqabətə girişdi

“Liverpul”un hücumçusu Məhəmməd Salahın gələcək taleyi ilə bağlı yeni iddialar gündəmə gəlib.

Sport1.az Caught Offside-a istinadən xəbər verir ki, Səudiyyə Ərəbistanının “Əl-İttihad” və “Əl-Hilal” klubları qış “transfer pəncərəsi”ndə misirli ulduzu heyətinə qatmaq üçün başlıca namizədlərdir. Məlumata görə, hər iki klub 33 yaşlı futbolçunun transferi üçün “Liverpul”a 80–100 milyon avro aralığında təklif göndərməyə hazırdır.

MLS təmsilçilərinin də Salahla maraqlandığı bildirilsə də, maliyyə imkanları baxımından Səudiyyə klubları ilə rəqabət aparmaqda çətinlik çəkdikləri vurğulanır.

Qeyd edək ki, Salah bir müddət öncə “Liverpul”un baş məşqçisi Arne Slotla münasibətlərinin gərginləşdiyini açıqlamış və hazırkı vəziyyətdə özünü “günah keçisi” kimi hiss etdiyini demişdi.

Misirli futbolçu bu mövsüm bütün turnirlərdə 19 matçda meydana çıxaraq 5 qol və 3 məhsuldar ötürmə ilə yadda qalıb. Onun klubla müqaviləsi 2027-ci ilin yayına qədər qüvvədədir.