Qutidən sərt müqayisə: “Mbappe tarixi zirvəyə Yamaldan daha yaxındır”

Madrid “Real”ının sabiq yarımmüdafiəçisi Quti hesab edir ki, Kilian Mbappe səviyyə baxımından Messi, Maradona və Kriştianoya Lamin Yamaldan daha yaxındır.

Sport1.az AS-a istinadən xəbər verir ki, keçmiş ulduz Yamalın böyük potensiala malik olduğunu qəbul etsə də, onu futbol tarixinin ən yüksək zirvələri ilə müqayisə etməyə tələsmir:

“De la Fuente deyir ki, Lamin Messi, Maradona, Kriştiano səviyyəsinə çata bilər. Məncə, o, əla futbolçudur və gələcəkdə “Qızıl top”u qazana bilər. Amma biz üç tarixi fenomen barədə danışırıq. Maradona Meksikada elə bir heyətlə mundialı qazandı ki, orada çox ulduz yox idi. Messi və Kriştiano isə ardıcıl 10 il ərzində mövsümə 50 qol vururdular. Bunu təkrarlamaq hər kəs üçün son dərəcə çətindir”.

Quti əlavə edib ki, bu səviyyəyə çatmağa ən real namizəd hazırda Mbappedir: “Məncə, Kilian bu zirvəyə Laminə nisbətən daha yaxındır”.

Qeyd edək ki, Mbappe bu mövsüm 20 oyunda 25 qol və 4 məhsuldar ötürmə, Lamin Yamal isə 16 matçda 8 qol və 9 assistlə çıxış edib.