Alonso Mbappeni Ronaldoyla müqayisə etdi: “Kilian seçilmişlərdəndir”
Madrid “Real”ının baş məşqçisi Xabi Alonso Kilian Mbappe ilə Kriştiano Ronaldonun oxşar xüsusiyyətlərindən bəhs edərək fransız hücumçunun klub tarixində mühüm iz buraxa biləcəyini bildirib.
Sport1.az AS-a istinadən xəbər verir ki, Alonso Mbappenin ambisiyasını, peşəkarlığını və komandaya verdiyi enerjini yüksək qiymətləndirib. Onun sözlərinə görə, gənc ulduzun gündəlik işə yanaşması və ətrafdakılara təsir etmə bacarığı Kriştianonun ən parlaq dövrlərini xatırladır: “Kilian “Real”da öz tarixini yazmağa doğru gedir. İstəkli olması, statistikasının səviyyəsi… O, seçilənlərdəndir. Hər gün onunla işləmək böyük məmnunluq verir. Oyuna gətirdiyi dinamika və komandanı irəli aparmaq istəyində Kriştiano ilə müəyyən oxşarlıq görürəm”.
Alonso əlavə edib ki, hər iki futbolçu öz dövrlərinin simvollarıdır: “Kriştiano bir epoxanın adıdır, Kilian isə indiki nəsil üçün liderdir. Hər ikisi qeyri-adi futbolçudur. Mbappenin komandamızda olması böyük üstünlükdür və onun potensialından maksimum yararlanmağa çalışmalıyıq”.
