“Barselona”nın qış strategiyası Arauxodan asılı vəziyyətə düşdü

“Barselona” qış “transfer pəncərəsi”ndə heyətinə müdafiəçi əlavə edə bilər.

Sport1.az Marca-ya istinadən xəbər verir ki, kataloniyalıların bu qərarı Ronald Arauxonun psixoloji vəziyyətindən asılı olacaq. Məlumata görə, uruqvaylı müdafiəçinin emosional durumunda yaranan gərginlik klubun mövqeyini dəyişməyə vadar edib.

Əvvəllər yanvar ayında yeni oyunçu transferi gündəmdə olmayıb. Lakin Çempionlar Liqasının “Çelsi” ilə görüşündən sonra vəziyyət fərqli şəkil alıb. Həmin matçda 44-cü dəqiqədə qırmızı vərəqə alan Arauxonun emosional olaraq çətin dövr keçirdiyi vurğulanır.

Bildirilib ki, müdafiəçi bu həftənin əvvəlində klubdan bərpa üçün qeyri-müəyyən müddətə vaxt istəyib. “Barselona” isə futbolçunun tam şəkildə özünü toparlamamasını nəzərə alaraq, qışda müdafiə xəttini gücləndirmə ehtimalını ciddi şəkildə müzakirə etməyə başlayıb.