Yamaldan etiraf: “Məşhurluq mənə sadə həyat yaşamağa imkan vermir”
“Barselona”nın və İspaniya millisinin hücumçusu Lamin Yamal məşhurluğunun gündəlik həyatına necə təsir etdiyini danışıb.
Sport1.az CBS News-a istinadən xəbər verir ki, gənc futbolçu yaxın ətrafının ona daim sərhədlər qoyduğunu deyib:
“Peşəkar idmançıların azarkeşləri və onları qoruyan çevrəsi olur. Uğurlu idmançıların isə yaxınları “yox” deyərək onları yanlış addımlardan çəkindirə bilir. Mənim də ətrafım eynilə belədir. Nə desəm, “yox” cavabını alıram. Harasa getmək istəyirəm, “yox”. Restorana getmək istəyirəm, “yox”. Mən kimə qulaq asıram? Yalnız anama”.
Yamal adi bir 18 yaşlı gənc kimi yaşaya bilmədiyini etiraf edib:
“Bu çətindir. Çünki adi 18 yaşlı gənc məktəbdən çıxıb evə gedir. Mən isə məşqə gedirəm və həmin vaxt artıq bir neçə jurnalist evimin qarşısında həyatımla bağlı suallar verməyə hazır olur. Televizoru açanda özümü görürəm, küçəyə çıxıram, uşaqlar mənim formamı geyinir. Harasa içməyə getmək istəyirəm, amma mane olurlar. Ona görə də sadə şeylərdən zövq almağa çalışıram: videooyun oynamaq, qardaşımla vaxt keçirmək. Düzünü desəm, heç vaxt adi 18 yaşlı ola biləcəyimə inanmıram. Çünki insanlar məni adi biri kimi görmür və mən də artıq belə ola bilmərəm”.
