“Bavariya”nın gənc ulduzu sağalır

“Bavariya”nın hücumameyilli yarımmüdafiəçisi Camal Musiala uzun fasilədən sonra fərdi məşqlərə başlayıb.

Sport1.az xəbər verir ki, bu barədə Münhen klubunun sosial şəbəkə hesabı məlumat yayıb.

Gənc futbolçu ABŞ-də keçirilən Klublararası Dünya Çempionatının 1/4 finalında PSJ-nin sabiq qapıçısı Canluici Donnarumma ilə toqquşma zamanı ayağının baldır sümüyünü qırmışdı və o vaxtdan bəri bərpa prosesində idi. Həmin oyunda alman təmsilçisi 0:2 hesabı ilə uduzmuşdu.

Musiala ötən mövsüm 44 qarşılaşmada 21 qol vurub və 8 məhsuldar ötürmə edib. 22 yaşlı yarımmüdafiəçi indiyədək “Bavariya”nın heyətində bütün turnirlər üzrə 206 matça çıxıb. Onun klubla müqaviləsi 2030-cu ilə qədər qüvvədədir.