Kehat bu komandalara qarşı keçirilən oyunları "Şamaxı" ilə matçdan daha həyacanlı hesab edir – AÇIQLAMA

Misli Premyer Liqasının XIII turunda "Sumqayıt" səfərdə "Şamaxı"nı 2:1 hesabı ilə məğlub etdi.

Qarşılaşmadan sonra "gənclik şəhəri" təmsilçisinin yarımmüdafiəçisi Roy Kehat matç haqda fikirlərini Sport1.az-a açıqladı: 

"Ağır oyun keçdi. "Şamaxı"ya qarşı səfərdə çıxış etmək bizim üçün hər zaman çətin olub. Süni otda oynamaq bizim üçün asan deyildi. Meydan sahibləri görüşə yaxşı hazırlaşmışdı. Güclü pressinqləri və qurduğu hücumlarla qapımızda təhlükəli epizodlar yaratdılar. Lakin biz döyüşkən xarakter nümayiş etdirərək qarşılaşmanın son dəqiqələrində üstünlüyü ələ aldıq. Beləliklə də bu ağır səddi aşaraq 3 xalla evə qayıdırıq".

İsrailli futbolçu bu matçın mövsümün ən gərgin qarşılaşmalarından olduğunu düşünmür:

"Fikrimcə, "Qarabağ"la və "Sabah"la keçirdiyimiz oyunlar daha həyəcanlı və gərgin keçib".

33 yaşlı oyunçu komandasının avrokubok şanslarını belə dəyərləndirdi:

"Hazırda tək hədəfimiz növbəti oyunlarda özümüzü yaxşı tərəfdən göstərək. Səhvlərə yol verməyək. Sonda nə olduğunu görəcəyik".

MİKAYIL HACIYEV