PFL Premyer Liqa ilə bağlı elə qərar qəbul edib ki... – ARAŞDIRMA

Misli Premyer Liqasının 13-cü turunda “Şamaxı” “Sumqayıt”a məğlub oldu - 1:2.

Sport1.az xəbər verir ki, qarşılaşmanın 88-ci dəqiqəsində Aleksa Yankoviç hesabı bərabərləşdirdi. Bundan sonra Ayxan Abbasovla Saşa İliç arasında münaqişə yaşandı. Görüşün hakimi Tural Qurbanov hər iki baş məşqçini qırmızı vərəqə ilə cəzalandırdı.

Görüş başa çatdıqdan sonra çalışdırıcılar mətbuat konfransında iştirak etmədilər, onların köməkçiləri media qarşısına çıxdılar. Burada bir sual yaranır: Baş məşqçilər nə üçün mətbuat konfransında iştirak etmədilər? Əvvəlki mövsümlərdə oyun ərzində qırmızı vərəqə alan çalışdırıcılar qarşılaşmadan sonra jurnalistlərin önünə çıxırdılar. Görəsən niyə Şamaxıda bu proses baş tutmadı?

Məsələ ilə bağlı Sport1.az olaraq kiçik araşdırma apardıq. Sən demə, PFL 2025/26 mövsümü üçün əsasnamədə dəyişiklik edib. 13-cü maddənin (AFFA nümayəndəsi, hakimlik və inspeksiya) 11-ci bəndinin “ə” punktunda qeyd olunur:

"Texniki zonadan uzaqlaşdırılmış məşqçi oyun zamanı mətbuat konfransında iştirak edə bilməz. AFFA İntizam Komitəsinin qərarı ilə cəzalandırılan baş məşqçi və ya məşqçi cəza müddətində mətbuat konfransında, eləcə də oyunöncəsi isinmə hərəkətlərində iştirak edə bilməz.

Cəzalı məşqçi həm cəza aldığı oyunda, həm də AFFA-nın qərarı qüvvədə olduğu müddətdə Zona-1 ərazisinə daxil ola bilməz. O, yalnız tribunada əyləşə bilər. Bu müddətdə məşqçi idman ləyaqətinə uyğun davranmalıdır. 

Əgər hər hansı bir insident və ya qeyri-idman hərəkəti baş verərsə, AFFA nümayəndəsi və raportu yazan şəxslər bunu qeyd edə və məşqçinin cəzası artırıla bilər. Bu qaydalar digər rəsmi şəxslərə və futbolçulara da aiddir".

MƏHƏMMƏD HÜSEYNOV