“Sumqayıt”ın qələbə sirləri: Köməkçi məşqçi hər şeyi açıqladı

Misli Premyer Liqasının 13-cü turunda “Sumqayıt” səfərdə “Şamaxı”nı 2:1 hesabı ilə məğlub edib.

Sport1.az xəbər verir ki, görüşdən sonra keçirilən mətbuat konfransında qonaq komandanın məşqçisi Veliçko Kaplanoviç jurnalistlərin suallarını cavablandırıb. O, baş məşqçi Saşa İliçin matçın sonlarında aldığı qırmızı vərəqə səbəbindən konfransa qatıla bilmədiyini bildirib və media qarşısına onun əvəzinə çıxıb:

“Qələbəyə görə sevinirəm. Xarakter göstərdik. Bəzi itkilərimiz var idi. Xüsusilə də, Rayan Senhaci oynamırdı. “Şamaxı” hesabı açdı. Onlara qarşı oynamaq çətindir. Amma biz bunu bacardıq, xarakter göstərdik, qalib gəldik. Oyunçularımı təbrik edirəm”.

Kaplanoviç komandanın aparıcı üzvü Höccət Haqverdinin meydana çıxmamasının səbəbini də açıqlayıb: “Xırda zədəsi var idi. Meydançanın süni olduğunu da nəzərə alsaq, riskə getmədik”.

O, həmçinin Ayxan Abbasovla Saşa İliç arasında yaşanan gərginliyə də münasibət bildirib: “İnanın ki, heç nə bilmirəm. Çünki həmin anda oyuna baxırdım və futbolçularımızdan biri ilə danışırdım. Epizodun nəyə görə baş verdiyini dəqiq görmədim”.