“Şamaxı”nın sirrli planı ortaya çıxdı – Ayxan Abbasov etiraf etdi

"Çətin səfər idi, yaxşı formada olan komandaya qarşı oynayırdıq. Bilirdik ki, son matçlarda "Sabah" qələbələri sıralayardılar. Biz də yaxşı hazırlaşmışdıq. Futbolçularımın göstərdiyi performans bizi sevindirdi.Təəssüf edirəm ki, qol epizodlarını dəyərləndirə bilmirik. Çempionatın başlanğıcından 100 faiz qol epizodlarını dəyərləndirə bilmirik. Amma bunun üzərində çalışırıq. Oyun planımızdakı epizodlar alındı. Vacib xal qazandıq. Gələcəyə baxacağıq".

Sport1.az xəbər verir ki, bu sözləri "Şamaxı"nın baş məşqçisi Ayxan Abbasov Misli Premyer Liqasının 12-ci turunun "Sabah"la görüşündən sonra keçirilmiş mətbuat konfransında deyib. O, jurnalistlərin suallarını cavablandırıb.

- Mübahisəli epizodları izlədiz?

- Düzünü deyim, təkrara baxmadım. Oyunun tempi yaxşı idi. Baş hakim də mübarizəyə bir az imkan verirdi. Mərkəzdə 1-2 epizodlar oldu ki, xırda foullardır. Bu da olur. Meydançadakı hər şeyə onsuz da reaksiya veririk. Yəqin ki, VAR-da baxırdılar. Mən baxmamışam, heç nə deyə bilmərəm.

- Rüfət Abbasov bu gün vinger mövqeyində oynadı. Deyəsən, yeni Toral Bayramov yetişdirirsiz?

- Bu gün sistem sırf rəqibə görə idi. "Sabah"ın yaxşı hücumları var. Rəqibə görə sistemi dəyişmişdik. Rüfətə bir az da inam gəlməsi üçün hücumda oynatdıq. Birinci hissədə yaxşı idi, sonra yoruldu. Rüfət universal oyunçudur. Bəlkə gələcəkdə sağ cinahda da oynatdıq.

- Demək olar ki, "Sabah"ı daha yaxşı tanıyırsız...

- Bu mövsüm onlara uduzmuşduq. Ötən mövsüm maraqlı keçmişdi. "Sabah"ın baş məşqçisi indi fərqli adamdır. Bəlkə "Sabah" bizdən bu sistemi gözləmirdi. Çempionatda bütün komandalar bir-birini yaxşı tanıyır. Biz də hansısa məqamda təəccübləndirmək istədik. Ola bilərdi ki, alınmasın. Məşqçisənsə, risk etməlisən. Ən sevindiyim odur ki, futbolçular tez qəbul edirlər. "Sabah" yaxşıdır, bu mövsüm daha rəngarəng oynayırlar.

- Legioner limitinin ləğvindən sonra futbolun keyfiyyətinin artacağı deyilirdi. Amma meydanda bu keyfiyyət görünmür. Ötən mövsümlə müqayisədə keyfiyyət artıb?

- Bizim liqa çətindir. Bunu kənardan mütəxəssislər də deyir. Bəzən yaxşı görünməməsinin səbəbi oyun saatı, stadiondakı boş tribunalardır. Bəlkə baxmırıq, amma biz bir çox liqalara baxırıq. Məsələn, Xorvatiya, Serbiya kimi çempionatlara baxırsan, bəzən oyunda heç iki korner olmur. Biz əvvəl daha çox meydanda hücum futbolu oynanılırdı. Amma indi vəziyyət dəyişib. Taktiki mübarizə daha ön plana çıxıb. Komandaları başa düşmək olar, nəticəyə oynayırlar. Limitin ləğvindən sonra səviyyənin tez artacağı fikri ilə razılaşmıram.

- Hazırkı temp, çempionata baxanda gələcəkdə milli komanda nəsə ümid verir?

- Bilmirəm temp necə görünür. Bu oyunun göstəriciləri bilmirəm. Oyunun təmiz necə keçdiyinə baxmalıyıq. Premyer Liqamız bir çox ölkə çempionatlarından üstündür. Bizdə ən aşağı dəqiqə 35-37 olur. Amma ölkələr var ki, 30 dəqiqə futbol oynanılır. "Qarabağ"la oyunumuz təmiz 60 dəqiqə oynanılmışdı. Çox yüksək idi. Artırmalıyıq. Çempionatın tempi artanda milli də yaxşılacaq demək düzgün deyil. Komandada rəqabət olmalıdır. Baxın, Xəyal Əliyev “Sabah”da əsas heyət üzvüdür. Rəqabəti də artırmalıyıq.