AFFA klublara yenə problem yaradır

AFFA-nın klublara ayırdığı vəsaitlə bağlı yenidən narazılıq yaranıb.

Sport1.az-ın əldə etdiyi məlumata görə, assosiasiya yalnız avqust və sentyabr ödənişlərini köçürüb. Lakin oktyabr və noyabra aid vəsait hələ də verilməyib. Bu səbəbdən Premyer Liqa, I Liqa və II Liqa komandalarının bəzilərində maaşların gecikməsi və gündəlik xərclərin ödənilməsində çətinliklər yaranıb.

Qeyd edək ki, AFFA Premyer Liqada çıxış edən hər kluba illik 2,5 milyon manat ödəyir. Birinci Liqadakı 10 klubun hər birinə 300 min, İkinci Liqada mübarizə aparan 12 klubun hər birinə isə 50 min manat ayrılır. Bu vəsaitlər hissə-hissə klub hesablarına köçürülməlidir.

Son ödənişlərin gecikməsi bir sıra komandaların maliyyə durumunu ağırlaşdırıb. AFFA isə gecikmənin səbəbi ilə bağlı klublara hansısa məlumat verməyib.

ZƏFƏR HACILI