Benzema Ronaldo ilə arasındakı münasibətlər barədə yayılan şayiələrə aydınlıq gətirib
“Əl-İttihad”ın hücumçusu Kərim Benzema keçmiş komanda yoldaşı, hazırda “Əl-Nəsr”da çıxış edən Kriştianu Ronaldo ilə əlaqələrinin əla olduğunu bildirib.
Sport1.az AS-a istinadən xəbər verir ki, fransalı forvard Səudiyyə Ərəbistanına gələn ulduz futbolçuların ölkənin futbol inkişafında mühüm rol oynadığını deyib:
“Buraya Kriştianu və mənim kimi, Avropa təcrübəsi gətirən futbolçular lazımdır. Məqsədimiz buradakı uşaqlara daha böyük klublara gedə bilmələri üçün nələrə ehtiyac olduğunu göstərməkdir. Ölkə getdikcə daha açıq olur, insanlar bir-birinə hörmətlə yanaşır. Mənə burada hər şey xoşdur”.
Benzema son oyunda Ronaldoyla soyuq salamlaşmasına dair yayılan xəbərlərə də münasibət bildirib:
“Jurnalistlər bunu şişirdir. Biz meydançaya çıxmazdan əvvəl içəridə söhbət etdik, qucaqlaşdıq. Meydanda bunu bir daha təkrarlamağa ehtiyac yoxdur. Bir-birimizi çox yaxşı tanıyırıq və hörmət edirik. Kameraya oynamağa ehtiyacımız yoxdur. Hər birimiz meydanda öz işimizə fokuslanırıq”.
