İmad Farajdan etiraz: "Bizdə olsaydı..." - MÜSAHİBƏ

Misli Premyer Liqasının "Zəfər turu"nun son görüşündə "Neftçi" səfərdə "Qarabağ"a uduzdu - 0:2.

Görüşdən sonra "ağ-qaralar"ın hücumçusu İmad Faraj Sport1.az saytına müsahibə verdi...

- Məğlub oldunuz. Oyun haqda nə söyləyə bilərsən?

- İlk hissədə yaxşı oynadıq. Bir neçə şanslarımız oldu. Müdafiə olunmağı da bacardıq. Güclü rəqibə qarşı oynayırdıq. Penaltidən sonra ruhdan düşdük. Toparlanmaqda əziyyət çəkdik. Hələ də adaptasiya prosesindəyik. 

- "Qarabağ"dan xal almaq üçün nə çatmadı?

- Fikrimcə, penalti qərarı matçın qırılma nöqtəsi oldu. O epiozda qədər deməzdim ki, "Qarabağ" bizdən güclü idi. Bərabər səviyyədə oyun gedirdi.

- Bu məğlubiyyət sizi ruhdan salacaq?

- Xeyr. Nə edəcəyimizi yaxşı bilirik. Son çempiona qarşı yaxşı mübarizə apardıq. Növbəti qarşılaşma daha da yaxşı olacaq.

- Bu oyun hakim qərarları ilə bağlı narazılığınız oldu?

- Sözün düzü penalti epizodunu görə bilmədim. Baş məşqçimiz mənə penalti olmadığını dedi. Hətta hakim belə qərarını çox tez verdi. Nəinki VAR yoxlaması, düşünməyə belə vaxt sərf etmədi. Eyni hal bizdə baş versə, hakim ən azı 10 dəqiqə yoxlayardı.

- 11 oyuna 15 xal toplamağınız sizi narahat edir?

- Mövsümə yaxşı başlamamışdıq. Təzə oyunçularımız çox olduğundan, adaptasiya problemləri yaşayırdıq. Lakin son görüşlərdə oyunumuzu düzəltmişik. Cəmi 2 dəfə məğlub olmuşuq. 

MİKAYIL HACIYEV