"Qışdan sonra həlledici oyunlar olacaq" - Azər Bağırov

Misli Premyer Liqasının XI turunda baş tutan “Kəpəz” – “Sabah” qa rşılaşmasından (1:3) sonra Gəncə təmsilçisinin baş məşqçisi Azər Bağırov mətbuat konfransında jurnalistlərin suallarını cavablandırıb.

Sport1.az xəbər verir ki, Bağırov ilk olaraq oyunla bağlı fikirlərini bölüşüb.

- İstədiyimiz heyətlə meydana çıxa bilmirik. Üç oyundur, çatışmazlıqlar var. Bu gün də Verdaşka yox idi. Oyun çətin keçdi. Nələrsə etməyə çalışırq, alınmır. Meydanda və meydandan kənar səhvlər var ki, düzəldə bilmirik. İstəmədiyimiz qollar buraxırıq.

- Ötən mövsümdə də komandanı çətin vəziyyətdə qəbul etsəniz də, dərhal dönüş etdiniz. Bu dəfə isə alınmır. Fərq nədir?

- Ötən mövsüm üç məğlubiyyətdən sonra qələbəmiz oldu. Bu dəfə əksi alındı, iki oyundan sonra məğlubiyyətlər başladı. “İmişli” ilə oyunda azlıqda qaldıq, “Neftçi” ilə matça itkilərlə çıxdıq, bu gün də Verdaşka yox idi. Ötən il fərqli situasiya idi. Səbəbləri bilirəm, amma danışmaq həll yolu deyil. Önümüzə baxmalı və qışa qədər maksimum xallar toplamalıyıq.

- Ötən mövsüm 30 xal kifayət etmişdi liqada qalmağa. Bu dəfə sizcə, 15 xal bəs edər?

- 32 xal yığmışdıq. Qışdan sonra toplanılan xallara görə “dördlük”də idik. Bu il komanda sayı çoxdur. Düşünürəm ki, liqada qalmaq üçün 20, 21 xal bəs edər.

- Hansı komandanın potensialı daha çoxdur?

- Dünən “Karvan-Yevlax” son dəqiqələrdə qol buraxdı. Bu gün biz də çətinliklər oldu. Qışdan sonra həlledici oyunlar olacaq.