Elvin Camalov: "Vacib olan seriyanı yaxalamaq idi" - MÜSAHİBƏ

Misli Premyer Liqasının X turunda "Neftçi" "Kəpəz"i 5:1 hesabı ilə məğlub etdi.

Görüşdən sonra meydan sahiblərinin yarımmüdafiəçisi Elvin Camalov Sport1.az saytına müsahibə verdi.

- Sanki "Kəpəz"ə qarşı bugünkü duel digər oyunlara baxmış daha asan keçdi...
- Bu matça ciddi hazırlaşmışdıq. Ən vacib məqam ilk hissədə qollar vurmağımız idi. Bununla da, ikinci 45 dəqiqədə işimiz rahatlaşdı.

- Komanda qollar vurmağa başlayıb. Abubakarın gəlişinin hücum xəttində rəqabət yaratdığı görünür...
- Kollektivə belə səviyyəli oyunçuların gəlməsi forma uğrunda mübarizəni artırır. Sambunun vurduğu 2 qoldan da bunu deyə bilərik. Ağadadaş kimi istedadlı oyunçumuz da var. Abubakarın gəlişi ona da xeyir verəcək. Fürsətlərdən də yaxşı istifadə edirlər.

- Çempionatda ardıcıl 2-ci, ümumi isə ard-arda 3-cü qələbənizi qazandınız. Ardı gələcək?
- Bundan öncəki oyunlarda heç-heçələr çox olurdu. Məncə, qara zolaqdan çıxmaq üçün belə seriyanı yaxalamaq lazım idi. Bunu da bacardığımız üçün qələbələrə inana bilərik.

- Bu seriyanı "Qarabağ"la oyunda da davam etdirmək necə olardı?
- Hər görüş bizim üçün ciddi əhəmiyyat daşıyır. Lakin "Qarabağ"la oyun rəqabət və gərginlik baxımından azarkeş üçün daha maraqlı keçir.

- Onların qarşıda Çempionlar Liqasında ağır oyunları var. Sizin istirahət üçün daha çox vaxtınız var. Bu baxımdan özünüzü üstün görürsünüz?
- "Qarabağ"ın 2 heyəti var. Hər ikisində də istedadlı futbolçuları var. Qalib tərəf olmaq üçün əlimizdən gələni edəcəyik.

- Çempionatın ilk oyunlarında istər qol vurmaq baxımından, istər də hücumlar baxımından əziyyət çəkirdiniz. Son oyunlarda isə işlər yaxşıya doğru gedir. Bunun sirri olaraq nəyi görürsən?
- Düşünürəm ki, əvvəlki görüşlərdə çatışmayan cəhətlərimiz olurdu. Hər qarşılaşmadan sonra bu problemləri analiz edib üzərində çalışırdıq. Nəticəsi olaraq da, qələbələr qazanırıq.

MİKAYIL HACIYEV