Ayxan Hüseynov: "Yenidən ora qayıtmaq bizim üçün sevindiricidir" - MÜSAHİBƏ

Misli Premyer Liqasının IX turunda "Turan Tovuz" səfərdə "Karvan Yevlax"ı məğlub etdi - 2:1

Görüşdən sonra qərb təmsilçisinin hücumçusu Ayxan Hüseynov Sport1.az saytına müsahibə verdi...

-Görüş haqda fikirlərin nələrdir?
-Bu günkü oyunun ağır olacağını bilirdik. Süni meydança ilə yanaşı, rəqibimizin də bizə çətinlik yaradacağı öncədən məlum idi. Autsayderlər sırasında olmalarına baxmayaraq, yüksək motivasiya ilə oynayırdılar. İkinci hissənin sonunda vacib qolları vuraraq qələbə qazandıq.

-Oyunun sonlarına yaxın rəqib hesabda önə keçsə də, hesabı yenidən öz xeyrinizə dəyişə bildiniz. Bu, sizdə hansısa narahatlıq doğurur?
-Sözün düzü rəqib bu günkü oyuna fərqli hazırlaşmışdı. Hansı ki, biz bunu gözləmədiyimiz üçün çətinlik çəkdik. Ən vacibi 3 xal idi, ona da nail olduq.

-Növbəti turdan Tovuzda oynamağa başlayacaqsınız. Bu faktor sizə nə qədər üstünlük verir?
-Yenidən ora qayıtmaq bizim üçün sevindiricidir. Azarkeşlərimizin yanına geri dönürük. “Şamaxı” ilə oyuna yaxşı hazırlaşmalıyıq. Bunun üçün yetərincə motivasiyamız da var. Bilirik ki, ora gələn istənilən komandaya çətinlik yarada bilirik. İstər komandamız, istərsə də azarkeşlərimiz.

-Artıq yeni stadionunuzda təbii otla oynayacaqsınız. Bu oyununuza necə təsir edəcək?
-Süni meydançada oynamaq bizim üçün çox çətindir. Bu dəyişikliyə görə rəhbərliyimizə, xüsusən də Ehtiram müəllimə təşəkkürlüyümü bildirirəm.

MİKAYIL HACIYEV