"Hayduk"un baş məşqçisi: "Nəticədən razıyam"

"Hayduk"un (Xorvatiya) baş məşqçisi Qonsalo Qarsiya UEFA Konfrans Liqasının 2-ci təsnifat mərhələsinin "Zirə" ilə keçirilən ilk matçını (1:1) şərh edib.

Sport1.az xəbər verir ki, o, oyundan sonra keçirilən mətbuat konfransında deyib: "Çətin oyun oldu. Oyuna həyəcanlı başladıq. "Zirə" bizi ilk fürsətdə cəzalandırdı. İkinci hissədə oyuna daha çox nəzarət edirdik. Hesabı bərabərləşdirdik, şanslarımız da var idi. Nəticədən razıyam.

Dünən də demişdim, gözlədiyim yaxşı "Zirə"ni gördüm. Uzun müddətdir eyni baş məşqçi ilə çalışırlar. Komanda çox təhlükəli rəqibdir. Müdafiədən hücuma keçidlərdə yaxşıdır, təzyiq göstərirlər, keyfiyyətli oyunçuları var".

Mütəxəssis növbəti oyun haqda da danışıb: "Qələbə qazanmağa çalışacağıq ki, oyun penaltilər seriyasına getməsin. Bizim də özümüzün oyun üslubu var. Bugünkü matçda da bəzi anlarda o üslubu göstərdik. İstəyirik ki, hər zaman oyuna nəzarət edək. Bu, tək "Zirə"yə qarşı deyil, bütün rəqiblərlə oyundadır. Ümid edirik ki, növbəti görüşdə qələbə qazanacağıq".

Q.Qarsiya bildirib ki, mərhələni keçə bilməsələr, bunu faciə saymayacaq: "Bu, futboldur. Davam edəcəyik. Biz yeni gəlmişik. Müəyyən şeyləri dəyişməyə çalışırıq. Ona görə əgər növbəti mərhələyə vəsiqə qazana bilməsək, bunu faciə kimi dəyərləndirməyəcəyik".