İmic yox, top dalınca qaç, Nəriman - KÖŞƏ

Nəriman "Kolumbus Kryu"ya ayaq basanda elə bildik ki, uşaq Amerikanı yenidən kəşf edəcək.

Biz də belə safıq. Kimdəsə balaca qığılcım görən kimi onun normal futbolçu olacağına inanırıq. Nəriman da ABŞ-a köçəndə sevinmişdik. Bəs, azərbaycanlı futbolçu MLS təmsilçisində nə ilə yadda qaldı?

Heç nə! Okeanın o tayında qol vurmağı unudub düşdü saç düzəltdirməyin, imic dəyişməyin dalınca. Meydanı podiumla səhv salıb, rəqib qapıçıları qorxutmaq əvəzinə, "İnstaqram"da yeni "look"u ilə diqqət çəkdi.

Futbolçumuzun ABŞ macərası uzun çəkmədi. "Kolumbus Kryu" millimizin üzvünü Super Liqanın yeni təmsilçisi "Erzurumspor"a 2027-ci ilin sonuna kimi icarəyə göndərdi. Nərimana ümid bəsləyirik? Şəxsən onun potensiallı, istedadlı olduğuna inanıram. Futbolçumuz daha güclü klublarda oynamağa layiqdir. Amma fikri-zikri saçını rəngləmək, gündə bir imic formalaşdırmaq olacaqsa, çətin ki, nəsə edə bilsin.

Nəriman, Erzurumun ayazı dondurucudur. Orada sənin saçının rənginə yox, topla münasibətinə, vurduğun qollara baxacaqlar. Super Liqada da MLS-dəki kimi "qol orucu"nu pozmasan, tribunalardakı azarkeşlər sənə elə "tamaşa" göstərəcək ki, "look"un saralacaq-bozaracaq.

Potensialını mənasız yerlərə xərclədiyini anlamağın, artıq top oynamağın vaxtıdır. "Erzurumspor" karyeranda dönüş nöqtəsi ola bilər. Amma əsas işini unudub yenə "stil" dalınca qaçsan, Ərzurumun sərt ayazında səni heç bir brend paltar isitməyəcək.

Qol vurmayan hücumçunu azarkeşlər sevinmirlər. Türkiyədəki fanatları da "vallah, mənim heç nəyim yoxdur" deyərək inandıra bilməyəcəksən! Ona görə də imic yox, top dalınca qaç, Nəriman!