Mübariz Mənsimov “Xəzər Lənkəran” əfsanələri ilə bir arada – Köhnə günlər yada düşdü
"Xəzər Lənkəran" klubunun sabiq prezidenti Mübariz Mənsimov sosial şəbəkə hesabında paylaşım edərək klubun keçmişinə dair xatirələrini bölüşüb.
Sport1.az xəbər verir ki, Mənsimov paylaşımında “Xəzər-Lənkəran”ın əfsanəvi futbolçuları Alim Qurbanov, Zaur Ramazanov və Azərbaycan futbolunda tanınmış simalardan biri olan Oktay Abdullayevin onun qonaqları olduğunu bildirib.
O qeyd edib ki, görüş zamanı əsas müzakirə mövzusu futbol və xüsusilə “Xəzər-Lənkəran”ın yadda qalan illəri olub:
“O vaxtlar həqiqətən başqa ab-hava var idi. Gözəl maçlar, güclü heyət, böyük mübarizə… “Xəzər-Lənkəran” Azərbaycan futbolunda öz izini qoymuş klubdur və hər zaman da insanların yaddaşında gözəl xatirələrlə qalacaq”.
Sabiq klub prezidenti həmin dövrün atmosferini xüsusi vurğulayaraq, Bakıya gəlib oyunları izləməyin və stadiondakı coşğunu yaşamağın unudulmaz olduğunu deyib. O, “Xəzər-Lənkəran” azarkeşlərinin komandaya bağlılığını və sədaqətini də xüsusi qeyd edib.
Paylaşımının sonunda Mənsimov klubun bütün azarkeşlərinə, futbolçularına, məşqçilərinə və kollektivinə salamlarını çatdırıb.
