Qurban Qurbanovun rəqiblərinin sayı çoxaldı

Sergen Yalçınla yollarını ayıran “Beşiktaş”ın yeni baş məşqçi axtarışları davam edir.

Sport1.az xəbər verir ki, Türkiyə mətbuatının yaydığı məlumatda “Qarabağ”ın çalışdırıcısı Qurban Qurbanovun İstanbul klubuna təyinat ehtimalı əvvəlki qədər yüksək qiymətləndirilmir. Buna səbəb “ağ-qaralar” rəhbərliyinin bir neçə namizəd üzərində paralel işləməsidir.

İddialara əsasən, rəhbərlik əcnəbi məşqçilərlə bağlı geniş siyahı hazırlayıb. Roberto Mançini, Razvan Luçesku və Ange Postekoqlu əsas namizədlər sırasında göstərilir. Hazırda “Əl-Sədd”də çalışan Mançininin illik 9 milyon avroluq maaş tələbi klub üçün ciddi maneə sayılır. Luçeskunun gələcəyi isə PAOK rəhbərliyi ilə keçirəcəyi görüşdən sonra dəqiqləşəcək. “Olimpiakos”da məsləhətçi vəzifəsində çalışan Postekoqlunun da gələn təklifləri nəzərdən keçirməyə hazır olduğu bildirilir.

Digər variantlardan Bruno Genesio artıq “Marsel”lə anlaşma əldə edib. Yerli məşqçilər arasında isə Arda Turanın adı alternativ seçim kimi gündəmdə qalır.