"Xankəndi": “Artıq doğma şəhərdə oynamağın vaxtıdır”

“Xankəndi”nin idman direktoru Vasif İsmayılov klubun gələcək planları və ev oyunları ilə bağlı açıqlama verib.

Sport1.az-ın məlumatına görə, o bildirib ki, yaranmasından cəmi iki il keçməsinə baxmayaraq, klub artıq ikinci çempionluğunu qazanıb.

Region Liqasının ardından II Liqanın da qalibi olan kollektiv növbəti mövsümdən I Liqada çıxış etmək hüququ əldə edib. Qeyd olunub ki, bunun üçün tələb olunan lisenziya artıq alınıb.

Vasif İsmayılovun sözlərinə görə, klub gələn mövsümdən etibarən ev oyunlarını Xankəndi şəhər stadionunda keçirməyə ümid edir. O, Peşəkar Futbol Liqası və AFFA rəhbərliyinin dəstəyini, eləcə də gənclər və idman naziri Fərid Qayıbovun son günlərdə stadiona etdiyi səfəri bu baxımdan önəmli amil kimi qiymətləndirib.

Bundan başqa, Azərbaycan Prezidenti İlham Əliyevin ölkədə idmanın, xüsusilə futbolun inkişafına göstərdiyi diqqət və qayğının Azərbaycan futbolunun inkişafında mühüm rol oynadığı vurğulanıb.

Qeyd edilib ki, “Xankəndi” Region Liqası və II Liqanın son “6-lıq” mərhələsindəki oyunlarını Şamaxı Olimpiya İdman Kompleksinin stadionunda, II Liqanın ilk dövrəsindəki qarşılaşmalarını isə “Palms Sports Arena”nın 4-cü meydançasında keçirib. Bakıda təşkil olunan məşqlər də müxtəlif stadionlarda baş tutub.

Klub rəsmisi artıq komandanın doğma şəhərdə çıxış etməsinin vaxtının çatdığını bildirib və rəqibləri Xankəndidə, yerli azarkeşlərin önündə qəbul etmək istədiklərini qeyd edib.

Bununla yanaşı, Xankəndidə fəaliyyət göstərən Qarabağ Universitetinin tələbələrindən ibarət fan klubunun mövcud olduğu və bunun xüsusi qürur mənbəyi sayıldığı diqqətə çatdırılıb.

Açıqlamanın sonunda vurğulanıb ki, uzun illər işğal altında olmuş bir şəhərdə Azərbaycan klubunun rəsmi oyun keçirməsi tarixi ədalətin və milli qürurun təcəssümü hesab olunur.