"Sabah” tarix yazdı: Avropada mövsümün sürpriz çempionları açıqlandı
“beIN SPORTS” Avropada bu mövsüm ölkə çempionu olan klublarla bağlı maraqlı araşdırma yayımlayıb.
Sport1.az xəbər verir ki "beinsports.com" tərəfindən hazırlanan araşdırmada ilk dəfə çempion olan komandalar, uzun illərdən sonra zirvəyə qayıdan klublar və ardıcıl çempionluğunu davam etdirən kollektivlər ön plana çıxarılıb.
Xüsusilə tarixində ilk dəfə qızıl medallara sahib çıxan komandalar diqqət mərkəzində olub. Hazırda bu siyahıda iki klub yer alır ki, onlardan biri Misli Premyer Liqasının qalibi "Sabah"dır.
Qeyd olunub ki, cəmi 9 illik tarixə malik Bakı təmsilçisi son 4 mövsümdə Azərbaycan futboluna hökm edən "Qarabağ"ın hegemonluğunu dayandırmağı bacarıb.
Araşdırmada İsveçrənin "Thun" klubuna da xüsusi yer ayrılıb. Bildirilib ki, 128 illik tarixə malik kollektiv uzun gözləntidən sonra nəhayət bu mövsüm ilk çempionluğunu qazanaraq kuboku muzeyinə aparıb.
Bununla yanaşı, İngiltərə, Avstriya, Danimarka, Rumıniya, Bolqarıstan və Macarıstanda da illərlə davam edən çempionluq həsrətinin sona çatdığı vurğulanıb.
