"Qarabağ"ın ikinci əcnəbi transferi bu futbolçu olacaq?

2026/2027 mövsümü öncəsi transfer çalışmalarını davam etdirən "Qarabağ"ın növbəti hədəfi bəlli olub.

Sport1.az "Transferfeed"ə istinadən xəbər verir ki, Ağdam təmsilçisi Xorvatiyanın "Dinamo" komandasında çıxış edən Xuan Kordoba ilə maraqlanır.

22 yaşlı kolumbiyalı oyunçu heyətə düşməkdə çətinlik çəkir. O, cari mövsümdə yalnız 1 matçda (22 dəqiqə) meydanda olub. Hücumçunun həmyerliləri Kevin Medina və Kamilo Duran hazırda "Qarabağ"da çıxış edir.

Xuan Kordobanın "Dinamo" ilə 2028-ci ilin yayınadək müqaviləsi var.

Qeyd edək ki, daha əvvəl "Qarabağ" fransalı vinger Jali Muaddibi transfer etdiyini açıqlamışdı.