Ebola virusuna görə Konqo yığmasının fanatları DÇ-2026-dan kənarda qalacaq?
Konqo yığmasının azarkeşləri Ebola virusu səbəbindən futbol üzrə dünya çempionatına buraxılmaya bilər.
Sport1.az CNN-ə istinadən xəbər verir ki, futbolçuların isə yalnız analizlərinin nəticəsi neqativ çıxacağı təqdirdə ABŞ, Kanada və Meksikaya girişlərinə icazə veriləcək.
Ebola virusu ilə əlaqədar ABŞ-də gücləndirilmiş sanitar nəzarəti tətbiq olunub. Bu səbəbdən Uqanda, Konqo Demokratik Respublikası və Cənubi Sudanı ziyarət etmiş xarici ölkə vətəndaşlarının ABŞ-yə girişinə qadağa qoyulub.
Sözügedən qadağa turnirin startına qədər ləğv edilsə belə, konqolu azarkeşlər ABŞ-yə gəldikdən sonra bir neçə həftəlik izolyasiya və karantin rejimində qalmalı olduqları üçün matçları tribunadan izləyə bilməyəcəklər.
Qeyd edək ki, DÇ-2026 iyunun 11-dən iyulun 19-dək ABŞ, Kanada və Meksikada keçiriləcək. Konqo yığması K qrupunda Portuqaliya, Özbəkistan və Kolumbiya milliləri ilə mübarizə aparacaq.
