Azərbaycan parataekvondoçuları Türkiyədə daha iki medal qazanıb
Türkiyənin Antalya şəhərində keçirilən Parataekvondo üzrə Türkiyə Açıq Beynəlxalq Turnirində gənc parataekvondoçularımız Amin Əliyev və Sabir Zeynalov bürünc medal qazanıblar.
Sport1.az xəbər verir ki, K44 kateqoriyasında 63 kq çəki dərəcəsində çıxış edən Amin Əliyev 1/8 finalda Paris-2024 Yay Paralimpiya Oyunlarının bürünc medalçısı Ayoub Adouich (Mərakeş), 1/4 finalda isə Mehmet Dönmez (Türkiyə) üzərində qələbə qazanaraq yarımfinala yüksəlib və turniri bürünc medalla başa vurub.
Digər idmançımız Sabir Zeynalov isə K44 kateqoriyasında 58 kq çəki dərəcəsində mübarizə aparıb. O, 1/8 finalda Timur Baitimirov (Rusiya), 1/4 finalda isə Fayoz Valijonov (Özbəkistan) üzərində qələbə qazanaraq yarımfinala vəsiqə əldə edib və yarışı bürünc medalla tamamlayıb.
Hər iki idmançımızın qazandığı bu nəticə Los-Anceles-2028 Yay Paralimpiya Oyunlarına reytinq xalları baxımından mühüm əhəmiyyət daşıyır.
