Qazax mütəxəssis “Qarabağ”ın sirrini açdı

“Qarabağ”da təcrübə keçən Qazaxıstanın “Akas” klubunun baş məşqçisi Dovran Kenjaxunov Azərbaycan çempionu barədə fikirlərini bölüşüb

Sport1.az xəbər verir ki, qazaxıstanlı mütəxəssis bu barədə “ASnews.kz” portalına açıqlamasında danışıb. O bildirib ki, Ağdam təmsilçisində bir ay davam edəcək təcrübə proqramı çərçivəsində komandanın məşq prosesini yaxından izləyir.

34 yaşlı məşqçi “Qarabağ”da yüksək səviyyəli şəraitin yaradıldığını qeyd edib: “Klubda bizi çox səmimi qarşıladılar. Komanda ilə tanış olduq, bütün infrastrukturu göstərdilər və lazımi şərait yaratdılar. Burada hər şey yüksək səviyyədə təşkil olunub”.

Kenjaxunov “Qarabağ”ın baş məşqçisi Qurban Qurbanovla görüşünün də onun üçün maraqlı olduğunu vurğulayıb: “Onunla sakit və rəsmi atmosferdə tanış olduq. Qurban Qurbanov çox ciddi və lider xarakterli insandır. Hiss olunur ki, komanda daxilində böyük nüfuza malikdir”.

Qazaxıstanlı mütəxəssis əlavə edib ki, Azərbaycan çempionunun uğurları təsadüfi deyil: “Burada məşq prosesini və klubun iş prinsipini yaxından görəndə onların Avropada əldə etdiyi nəticələrin səbəbini daha yaxşı anlayırsan. “Qarabağ” həqiqətən də başqa səviyyədədir”.