Elvin Yuniszadə "Karvan-Yevlax"ın Premyer Liqada qalacağına inanır - MÜSAHİBƏ
Misli Premyer Liqasının 23-cü turunda "Karvan-Yevlax" doğma meydanda "Sumqayıt"la heç-heçə etdi - 1:1.
Sport1.az xəbər verir ki, qarşılaşmadan sonra "ağ-qaralar"ın üzvü Elvin Yuniszadə jurnalistlərin suallarını cavablandırdı.
Həmin müsahibəni təqdim edirik...
– Ardıcıl 2 oyundur ki, məğlub olmursunuz. Görüş haqda fikirləriniz maraqlıdır...
– Oyuna yaxşı hazırlaşmışdıq. Bilirdik ki, çətin qarşılaşma olacaq. Son ev oyunumuzda məğlub olmuşduq və doğma meydanda xal qazanmaq istəyirdik. Düşünürəm ki, 1 xal da bizim üçün yaxşı nəticədir. Çox qol epizodlarımız oldu, amma istifadə edə bilmədik. Açığı, qələbəyə daha layiq tərəf biz idik. Bununla belə, heç-heçə də bizim üçün motivasiyadır. Son iki oyunda xal qazanmışıq. Düşünürəm ki, getdikcə daha yaxşı “Karvan-Yevlax” görəcəyik. Oyunumuz və motivasiyamız yaxşılaşır. Autsayderlər sırasından çıxmaq üçün bu xallar bizə çox vacibdir. Növbəti oyunlarda bu xalın böyük təsiri olacağını düşünürəm.
– Liqada qalmaq şansınız nə qədər real görünür?
– Çoxları turnir cədvəlinə baxaraq deyə bilər ki, artıq hər şey bitib. “Karvan-Yevlax” Premyer Liqanı tərk edəcək. Amma hələ heç nə bitməyib. Buradayıq və mübarizə aparırıq. Son iki oyunda 2 xal qazanmışıq. Düşünürəm ki, növbəti oyunda qalib gəlsək, hər şeyə baxış dəyişə bilər. Qarşıda çox oyun var və xal fərqini azalda bilərik. Hələ heç nə bitməyib. Bu vəziyyətlə barışmamışıq.
– Azarkeşlərə ismarıcınız nədir?
– Onlara təşəkkür edirəm. Pis günlərimizdə bizim yanımızdadırlar. Baxmayaraq ki, çox məğlubiyyətlərimiz oldu, onlar yenə də komandaya inanırlar. Azarkeşlərin dəstəyi bizim üçün çox önəmlidir. Ürəkləri bizimlə döyünür. Hər bir azarkeşə təşəkkür edirəm. Biz də çalışırıq ki, onları məyus etməyək və sevindirək.
– Növbəti turda “Araz-Naxçıvan” ilə qarşılaşacaqsınız. Rəqibdə müəyyən eniş hiss olunur. Qələbə qazanacağınıza inanırsınız?
– “Araz-Naxçıvan”la ilk oyunumuzda da pis oynamamışdıq. Sadəcə son dəqiqələrdə məğlub olduq. Niyə də yox? Bu gün hər bir komandaya qarşı oynamaq olar. Düzgün hazırlaşsaq və meydanda xarakter göstərsək, qələbə qazanmaq da mümkündür. Hətta səfərdən 1 xalla qayıtmaq da bizim üçün yaxşı nəticə ola bilər.
MƏHƏMMƏD HÜSEYNOV
