“Özümüz futbol oynayanda o qədər söyüşlər olur ki” – Qurban Qurbanov

Misli Premyer Liqasının 23-cü turunda “Qarabağ” evdə “Araz-Naxçıvan”a böyük hesabla qalib gəldi - 6:0.

Sport1.az xəbər verir ki, “köhlən atlar”ın baş məşqçisi Qurban Qurbanov oyundan sonra jurnalistlərin suallarını cavablayıb.

"Qadın azarkeşlər var idi, onlara təşəkkür edirəm. Bayramlarını təbrik edirəm. Yaxşı oyun alındı. Məhsuldar matç oldu. İstədiklərimiz alındı. Futbolçular özlərinə gəlməyə başlayırlar. Narazı qaldığım məqamlar da oldu, özlərinə dedim. “Araz-Naxçıvan”a uğurlar arzulayıram Böyük hesabla uduzsalar da, fəlsəfələrindən əl çəkmirlər".

- “Araz-Naxçıvan”a 3 oyunda 16 qol vurmusuz. Səbəbi açıq oynamalarıdı?

- Bu qədər qol olduğunu düşünməmişdim. Həmişə baxımlı oyun göstəriblər. Elmarın vaxtında da belə idi. İdman formamızda olan vaxta düşüb deyə belə ola bilər. Onlarla oynamaq asan olmayıb.

- Musa üçüncü oyundu qol vurur. Bu sizə yaxşı mənada çətinlik yaradacaq?

- Sevindirici haldı. Sonradan meydana daxil olan futbolçunun qol vurması üçün qabiliyyət lazımdı. Yaxşılığa doğri irəliləyiş çoxdu. Mübarizə aparmalıdı. Böyüyür, sevindiricidi. Hazırda ondan razıyam.

- Sanki komandada qapıçı məşqçisi yetişdirirsiz.

- Qapıçı məşqçisi Elxan Həsənovdu. Hamımız ona hörmət edirik. Hüseyn onun köməkçisidi. Qapıçıların sayı da çoxalır. Hər məşqdə 4-5 qapıçı olur. Elxan müəllim Hüseyni yetişdirir. Mənə də dedi ki, “Qalatasaray”a göndərək. Hüseyn bacarıqlı, qabiliyyətli uşaqdı.

- “Qarabağ”ın üçün əsl çempionluq mübarizəsinin bundan sonra başlayacağını demək olar?

- Daha çox diqqət ayıracağıq. Futbolçular bir az da özünə gəlməlidi. Ən gərgin illərdən biri oldu. ÇL oyunları, gözləntiləri. 10 yox, 3-4 xalımız olsaydı, daha rahat oynayardılar. Məsuliyyət artdı. Son tura kimi gərginlik, gərginlik… Futbolçularım da sağ olsun, dözdü. Hər oyunumuz son saniyələrə qədər dinamik keçir. İndi daha rahat hazırlaşmaq şansımız olacaq. İki oyundan sonra fasilə olacaq. Bu vacibdi ki, komanda bir olsun. “Sabah”ın şansı daha yüksəkdi.

- “Sabah”la kubokda da qarşılaşmağınız aranızdaki çempionatdakı mübarizəyə təsir edəcək?

- Əlbəttə. Ayrı turnirlərdi. Çempionatda başqa motivasiya olur, kubokda ayrı. ÇL ayrı prestijdi. Yaxşı hazırlıq olacaq.

- Kubok oyununa qisas kimi baxacaqsız?

- Yox.

- “Sabah”ın məşqçisinin cəzalanmaması sizə necə təsir etdi?

- Təsir hissi o oldu ki, olmamalı idi. Vərəqənin tərəfdarı deyiləm. Qalmaqallar da futbolun gözəlliklərindən biridi. Azarkeşlərə, futbolçulara motivasiya verir. Cəzanın tərəfdarı deyiləm. Qalmaqal oldu, yerindəcə həll olundu. Bu kin deyil, idman emosiyasıdı. Öz aramızda futbol oynayanda intriqa, dava edirik. Üzrlü sayın, söyüşlər də olur (gülür). Bu futbolun keyfiyyətli olmasına gətirib çıxarır.

- Qızınız da oyunda idi.

- Hə (gülür). Əsas qardaşı hiss edirdi (gülür).