Saşa İliç mövsümün sonu "Sumqayıt"dan ayrılacaq? - ÖZÜ AÇIQLADI

Misli Premyer Liqasının 23-cü turunda "Karvan-Yevlax" "Sumqayıt"la heç-heçə etdi - 1:1.

Sport1.az xəbər verir ki, oyundan sonra qonaqların baş məşqçisi Saşa İliç mətbuat konfransında iştirak etdi.

Mütəxəssis oyun haqda fikirlərini səsləndirdikdən sonra jurnalistlərin suallarını cavablandırdı:

"Çalışdıq ki, akademiyanın yetirmələrinə şans verək. Bundan sonra bu yolla davam edəcəyik".

– Qərarınızın səbəbi nədir?

– Rəhbərlikdən gələn tapşırıqdır ki, akademiya yetirmələrinə üstünlük verək. Kifayət qədər səhvlər etdik, keyfiyyətsiz oyun alındı. Penaltidən də yararlana bilmədik.

– Bu heyət autsayderlə də bacarmır. Qarşıdakı oyunlardan nə gözləyirsiniz?

– Baxacağıq.

– Strategiyanı dəyişmisiniz. Bu, sizin şəxsi iddianızla üst-üstə düşür?

– Verilən qərara hörmətlə yanaşıram.

– Son zamanlarda komandanın oyunlarında geriləmə hiss olunur. İddia var ki, yayda klubdan ayrılacaqsınız?

– Mövsümün sonuna hələ var. Nə qərar verilsə, qəbul edəcək. Müqaviləm mövsümün sonuna kimidir.

– “Sumqayıt” akademiyasının perspektivi haqda nə düşünürsünüz?

– Güclü akademiyamız var. Nəticə üçün müəyyən vaxt lazımdır. Qərarı başa düşürəm, avrokuboklara vəsiqə şansımız azalıb. Buna görə strateji yollar ayrılıb.

– Mövsümün əvvəlində qərar qəbul edilib ki, yerli, gənc oyunçuların oyun dəqiqəsinə görə bonuslar veriləcək. Bu strategiya məsələsində bu amilin rolu var?

– Bu barədə eşitmişəm. Strategiyanın dəyişməsi əsas avrokuboklara vəsiqə şanslarının azalmasıdır.

– Komandanın belə durumunda rəhbərliyin dəstəyini hiss edirsiz, ya narazılıq var?

– Komanda üçün çalışırıq. Mövsümün əvvəli yaxşı başladıq. Amma qış fasiləsində müəyyən tələblərim oldu. Onlar da alınmadı.

– Penaltiləri fərqli futbolçuların vurmasının izahı nədir?

– Bu, oyunçuların öz qərarıdır. Qarışmamışam.

– “Beşiktaş” – “Qalatasaray” oyununu izləyəcəksiniz?

– Əlbəttə, baxacağam. İki mövsüm “Qalatasaray”da oynamışam. Onların azarkeşiyəm.