“Karvan-Yevlax” Azər Həşimovla bağlı məsələni yoluna qoydu
Misli Premyer Liqası təmsilçisi “Karvan-Yevlax”la sabiq baş məşqçi Azər Həşimov arasında olan təzminat məsələsi həllini tapıb.
Sport1.az xəbər verir ki, bu barədə Yevlax klubunun mətbuat xidməti məlumat yayıb və tərəflər arasında razılıq əldə olunduğunu açıqlayıb.
“Son bir neçə ay ərzində klubumuzla baş məşqçi arasında mövcud müqavilə şərtləri və əməkdaşlığın davamı ilə bağlı danışıqlar aparılsa da, tərəflər arasında razılıq əldə olunmamışdı. Aparılan müzakirələrin yekununda isə qarşılıqlı anlaşma əsasında kompensasiya məbləğinin ödənilməsi ilə razılaşma əldə edilmiş və müqaviləyə xitam verilmişdir. Eyni zamanda baş məşqçi heyətində yer alan köməkçi məşqçilərlə də qarşılıqlı razılıq əsasında müqavilələrə xitam verilməsi barədə razılaşma əldə olunmuşdur. Klub olaraq bütün öhdəliklərimizi yerinə yetirmişik. “Karvan-Yevlax” məşqçilər heyətinə gələcək fəaliyyətlərində uğurlar arzulayır”, – deyə klubun açıqlamasında qeyd edilib.
