“Bu kubok deyil, zarafatdır” – Moriyentes İspaniya Superkuboku haqqında

Fernando Moriyentes İspaniya Superkuboku ilə bağlı maraqlı xatirəsini bölüşüb

Sport1.az xəbər verir ki, sabiq “Real” hücumçusu bu barədə “The Touchline” nəşrinə açıqlamasında danışıb. Moriyentes bildirib ki, Madrid klubunda qazandığı ilk titul məhz Superkubok olub, lakin komandadakı reaksiyalar onu təəccübləndirib.

Onun sözlərinə görə, oyunda iştirak etməsə də, Superkubok qələbəsini çox emosional qarşılayıb: “Bu, mənim üçün dünya çempionatı kimi idi. Sevinirdim, qışqırırdım, şampan istədim. Amma soyunub-geyinmə otağında digərləri tam sakit idi”.

Moriyentes deyib ki, komanda yoldaşlarından biri ona yaxınlaşıb və sakit olmağını istəyib: “Mənə dedilər ki, burada əsas məqsəd La Liqa və Çempionlar Liqasını qazanmaqdır. Evə get, dincəl və sabah məşqə gəl. Mən isə “Axı kubok qazandıq” dedim. Cavab belə oldu: “Hansı kubok? Bu, kubok yox, zarafatdır”.

Qeyd edək ki, Moriyentes “Real”ın heyətində çıxış etdiyi dövrdə İspaniya Superkubokunu qazanıb. Madrid klubu bu mövsüm Superkubokun yarımfinalında “Atletiko” ilə qarşılaşacaq.