“Real” Vinisiusu satıb, onu almaq istəyir

“Real” Vinisius Juniorla bağlı mümkün ayrılıq ssenarisinə artıq hazırdır.

Sport1.az xəbər verir ki, Madrid təmsilçisi braziliyalı vingerin klubla müqaviləni uzatmaması halında yarımmüdafiə xəttini gücləndirməyi planlaşdırır. Bu variantda əsas namizədlərdən biri PSJ-nin futbolçusu Vitinyadır.

Məlumata görə, Vinisiusun mövcud müqaviləsi 2027-ci ilin yayına qədər qüvvədədir. Razılaşmanın yenilənməməsi halında “kral klubu”nun oyunçunu 2026-cı ilin yayında satmaq ehtimalı var. Madrid klubu bu keçiddən minimum 100 milyon avro gəlir əldə etməyi hədəfləyir və həmin vəsaitin Vitinyanın transferinə yönəldilməsi nəzərdə tutulur.

Bildirilir ki, portuqaliyalı yarımmüdafiəçinin PSJ ilə sözləşməsində 100 milyon avro məbləğində sərbəstqalma bəndi mövcuddur. Futbolçunun keçidə razılıq verməsi halında bu bənd aktivləşdirilə bilər.

Qeyd edək ki, Vitinya cari mövsümdə bütün turnirlər üzrə 23 oyunda iştirak edib, 5 qol vurub və 8 məhsuldar ötürmə ilə yadda qalıb. Onun Paris klubu ilə müqaviləsi 2029-cu ilin yayına qədər davam edir.