“Real Madrid” “Barselona” ilə bağlı hüquqi addıma hazırlaşır

“Real Madrid” klubu Texniki Hakimlər Komitəsinin (CTA) keçmiş vitse-prezidenti Xose Mariya Neqreyra ilə bağlı iş çərçivəsində “Barselona”dan çoxmilyonluq təzminat tələb etməyə hazırlaşır.

Sport1.az xəbər verir ki, bu barədə AS nəşri məlumat yayıb. Bildirilir ki, Madrid təmsilçisinin rəhbərliyi katalon klubunun Neqreyra ilə uzun illər davam edən əməkdaşlığının idman rəqabətinə və klubun maliyyə maraqlarına zərər vurduğunu düşünür. Bu səbəbdən “kral klubu” hüquqi müstəvidə addım atmaq variantını gündəmdə saxlayır.

Məlumata görə, paytaxt təmsilçisi məsələ ilə bağlı məhkəmə iddiası qaldırmaq imkanını dəyərləndirir və “Barselona”nın Hakimlər Komitəsində yüksək vəzifə tutmuş şəxslə əlaqələrinin ədalətli rəqabət prinsiplərinə zidd olduğunu hesab edir.

Xatırladaq ki, 2023-cü ildə katalon klubu 2001–2018-ci illər arasında Xose Mariya Neqreyraya ümumilikdə təxminən 8,4 milyon avro məbləğində ödəniş etməkdə ittiham olunmuşdu. “Barselona” həmin vəsaitlərin hakimliklə bağlı texniki hesabatların hazırlanması üçün məsləhət xidmətlərinə görə verildiyini bildirmişdi. Neqreyra isə hakimlərə təsir göstərilməsi məqsədilə rüşvət aldığını qəti şəkildə təkzib edir.