Peres Vinisiusla bağlı qərarını verdi
Madrid “Real”ının prezidenti Florentino Peres hücumçu Vinisius Junioru komandada saxlamaq niyyətindədir.
Sport1.az xəbər verir ki, bu barədə “Marca” nəşri məlumat yayıb. Mənbənin yazdığına görə, “kral klubu”nun rəhbəri yaxın müddətdə braziliyalı futbolçu ilə yeni müqavilə imzalamaq üçün addımlar atmağı planlaşdırır. Vinisiusun hazırkı sözləşməsi 2027-ci ilin yayına qədər qüvvədədir.
Qeyd edək ki, bir müddət əvvəl “Marca” “Real” azarkeşləri arasında Vinisius Juniorun gələcəyi ilə bağlı sorğu keçirib. Sorğuda iştirak edən fanatların 86 faizi futbolçunun satılmasının daha doğru qərar olacağını düşünür.
25 yaşlı hücumçu 2018-ci ilin yayından Madrid təmsilçisinin formasını geyinir. Bu müddət ərzində Vinisius “Real”ın heyətində 346 oyuna çıxıb, 111 qol vurub və 91 məhsuldar ötürmə ilə yadda qalıb.
Cari mövsümdə isə braziliyalı futbolçu bütün turnirlərdə 24 matçda iştirak edib, 5 dəfə fərqlənib və 8 assist edib.
