“Neftçi”nin kapitanı danışdı: problemlər, Vernidub və ümidlər

Misli Premyer Liqasının 16-cı turunda “Neftçi” səfərdə “Karvan-Yevlax” üzərində çətin qələbə qazandı – 2:1.

Qarşılaşmadan sonra bakılıların kapitanı Emin Mahmudov Sport1.az-ın suallarını cavablandıraraq matç, komandanın hazırkı durumu, baş məşqçi dəyişikliyi və mövsümün ümumi gedişi ilə bağlı fikirlərini bölüşdü...

- “Karvan-Yevlax”la oyun gözlənildiyi kimi çətin keçdi. Bu qələbəni necə dəyərləndirirsiniz?

- Oyun ağır keçdi. Meydan da ağır idi. Yenə də çoxlu qol şanslarını boşa verdik. Halbuki ötən tur bunun əziyyətini çəkmişdik. “Sumqayıt”la oyunda 2:0 hesabda öndə olarkən xeyli şansı boşa verdik. Üçüncü, dördüncü qolu vurmalı idik. Şanslardan yararlanmadıq və yekunda xal itkisi ilə üzləşdik. Bu dəfə xarakter göstərdik. Oynamaq, mübarizə aparmaq çətin idi. Rəqib də bizi yaxşı analiz eləmişdi. İstədiyimiz oyunu göstərməyə mane olurdu. Şükür, yaxşı qurtardıq. Çətin də olsa, qalib gəldik.

- Komanda yenə də bir sıra real qol imkanlarından yararlana bilmədi. Sizcə, bunun səbəbi nədir?

- Nəsə demək çətindir. Məşqlərdə də çox çalışırıq. Ümid edirəm ki, tezliklə vəziyyət yaxşıya doğru dəyişəcək. Qış fasiləsindən sonra şanslarımızı daha yaxşı dəyərləndirəcəyik. Elə oyunlar olurdu ki, qol epizodu yaratmaqda çətinlik çəkirdik. Lakin indi oyun var, çoxlu şanslarımız olur. İntensiv futbol sərgiləməyə çalışırıq.

- Yeni baş məşqçi Yuri Vernidubun gəlişi komandada hansı dəyişiklikləri yaradıb?

- Başqa cür oynamağımızı istəyir. Samir Abbasovun fəlsəfəsi başqa idi, Yuri Vernidubda başqa. Vernidub daha aqressiv olmağımızı istəyir. İnanıram ki, qışdan sonra hər şey yaxşı olacaq.

- Qış fasiləsi komandanın toparlanması və Vernidubun “Neftçi”ni tam formalaşdırması üçün yetərli olacaqmı?

- Bunu oyunlar göstərəcək. Əslində Vernidub artıq komandanı tanıyır. Biz də onun nə istədiyini bilirik. “Sumqayıt”la matçda 60 dəqiqə çox yaxşı oynamışdıq. Bu, onun istədiyi futbol idi. O qədər şansımız var idi. İnanmırdım ki, oyun 2:2 olsun. “Karvan-Yevlax”la matçda isə ilk hissədə zəif təsir bağışladıq. İkinci 45 dəqiqədə daha yaxşı oynadıq.

- 2025-ci il başa çatır. Bu ili “Neftçi” üçün necə xarakterizə edərdiniz?

- İl bizim üçün çox pis keçdi. Cədvəl hər şeyi göstərir. Çox danışmağa ehtiyac yoxdur. İlin ilk yarısında avrokuboklardan kənarda qaldıq. Yeni mövsümdə də istədiyimiz kimi çıxış etmədik. Ümid edirəm ki, bütün uğursuzluqlarımız 2025-ci ildə qalar. Yeni ildən sonra hər şey “Neftçi” üçün daha yaxşı olacaq.

- Sizin fikrinizcə, 2025-ci ilin ən yaxşı yerli futbolçusu kimdir?

- Məncə, “Qarabağ”ın futbolçularını qeyd etmək olar. Onlar bu ili çox yaxşı keçirdilər. Elvin Cəfərquliyev deyərdim. O, həqiqətən də çox yaxşı oyunlar keçirdi. Klubunda da, millidə də yaxşı təsir bağışladı.

MİRZƏ S.