"Qarabağ"ın futbolçusu 4–6 ay yaşıl meydanlardan uzaq qalacaq

Xəbər verdiyimiz kimi, Azərbaycan millisinin və “Qarabağ”ın qapıçısı Şahruddin Məhəmmədəliyev cərrahi əməliyyat keçirib.

Sport1.az xəbər verir ki, 31 yaşlı qolkiper Almaniyanın Plattlinq şəhərində yerləşən özəl klinikaların birində sol bud-çanaq oynağından uğurla əməliyyat olunub. Həkimlərin rəyinə əsasən, Şahruddinin müalicə və bərpa prosesi 4–6 ay davam edəcək.

Qapıçı DÇ-2026-nın seçmə mərhələsi çərçivəsində Bakıda Fransa millisinə qarşı keçirilən oyunda (1:3) zədələnmişdi. O, həmin qarşılaşmanın fasiləsində əvəzlənmişdi.

Qeyd edək ki, Şahruddin Məhəmmədəliyevin əməliyyat və sonrakı müalicə xərcləri AFFA tərəfindən qarşılanır. Futbolçunun bərpa prosesi klubun tibbi heyətinin nəzarəti altında davam edəcək.