Vadim Abdullayev yevlaxlılara səsləndi: "Pis gündə də, yaxşı gündə də..." - MÜSAHİBƏ

Misli Premyer Liqasının 15-ci turun “İmişli” “Karvan-Yevlax”ı qəbul etdi - 1:1.

Qarşılaşmadan "ağ-qaralar"ın yarımmüdafiəçisi Vadim Abdullayev Sport1.az-a müsahibə verdi...

- Soyuq hava, çətin şəraitdə keçən görüş haqda nə söyləyə bilərsən?

- Hamı bilirdi ki, gərgin oyun olacaq. Belə havada mübarizə əsas ön plana çıxır. Düşünürəm ki, 1:1 hesabı ədalətli nəticədir. Hər iki komanda əlindən gələni etdi. Belə şəraitdə hər iki tərəf üçün 1 xal əhəmiyyətli idi.

- Bu nəticə gələcək oyunlara necə təsir göstərə bilər?

- Hazırkı vəziyyət hər kəsə məlumdur. Turnir cədvəlinin son pilləsində qərarlaşmışıq. Çalışırıq ki, bu durumdan çıxaq. Qazanılan 1 xal bizim üçün həm motivasiya , həm də növbəti oyunlara daha yaxşı köklənmək baxımdan çox vacib idi. Futbolda psixoloji vəziyyət fiziki durumdan daha önəmlidir. İnanıram ki, qarşıdakı oyunlarda hər xal bizə əlavə güc verəcək.

- "Karvan-Yevlax" "İmişli" ilə oyunda meydanda hansı müsbət tərəflərlə yadda qaldı?

- Ən önəmli məqam bu idi ki, meydanda bir komanda idik. İstər əsas heyət, istər ehtiyat oyunçular, istərsə də texniki heyət hamı bir yumruq kimi birləşmişdi. "Karvan-Yevlax" bu gün stadionda öz ağırlığını göstərdi. Komanda ruhumuz və birliyimiz oyunun ən dəyərli tərəfi oldu.

- Çoxları düşünür ki, "Karvan-Yevlax" Premyer Liqanı tərk edəcək. Azarkeşlərinizi ümidləndirəcək nə deyə bilərsən?

- Onlara təşəkkür edirəm. Biz bu duruma düşmək istəməzdik. Komandamız yenidir, təbii ki, müəyyən çatışmazlıqlar var. Amma çalışırıq ki, əlimizdən gələni edək. Bilirik ki, bu bölgə illərdir əsas liqada təmsil olunmur. İstəyirik ki, insanlara yenidən futbolun sevincini yaşadaq. Azarkeşlərdən istəyimiz budur ki, bizi tək qoymasınlar. Pis gündə də, yaxşı gündə də bizimlə olsunlar. İlin son matçı "Neftçi"yə qarşı olacaq. Ümid edirik ki, onların dəstəyi ilə yaxşı nəticə əldə edəcəyik.

MƏHƏMMƏD HÜSEYNOV