Bekhem Messinin Mayamidə qalmasını istəyir

Devid Bekhem “İnter Mayami”nin ulduzu Lionel Messinin karyerasını bitirdikdən sonra da şəhərdə qalmasını arzuladığını deyib.

Sport1.az xəbər verir ki, klubun həmsahibi və prezidenti komandanın MLS Kubokunu qazanmasında böyük pay sahibi olan argentinalı hücumçunu yüksək dəyərləndirib. “İnter Mayami” finalda “Vankuver Uaytkaps” üzərində 3:1 hesablı qələbə ilə tarixində ilk dəfə çempion olub.

Bekhem müsahibəsində Messinin “Barselona”ya bağlılığının unikal olduğunu vurğulayıb: “İstərdim ki, Leo karyerasını bitirdikdən sonra Mayamidə yaşasın. Amma o mənə dedi ki, fikirləri yalnız “Kamp Nou”nun yaxınlığında yaşamaq üzərindədir. “Barselona”nı onun qədər sevən başqa futbolçu yoxdur. Hətta ayağında və su butulkasında belə klubun loqosunu görə bilərsiniz”.

O, final oyunundan da danışıb: “Matçın son dəqiqələrində məqsədimiz yalnız qol vurmaq idi. “Vankuver” möhtəşəm görüş keçirdi və bizə ciddi təzyiq etdi. Onlar hesabı açanda müəyyən müddət üstünlük də qazandılar. Amma topu yenidən mərkəzə daşıdıqdan sonra oyunu çevirə bildik. Messiyə top verəndə o sadəcə fürsət yaradır. Komanda çox sıx birləşmiş vəziyyətdə idi”.

Bekhem klubun uğuruna gedən yolda çox çalışdıqlarını əlavə edib: “Böyük çətinliklər, çoxsaylı yuxusuz gecələr oldu. Amma həmişə Mayamiyə və burada güclü komanda quracağımıza inanmışam. Mükəmməl iş ortaqları tapdım və anladım ki, hər şey mümkündür. Futbolçularımızın formasının arxasında yazıldığı kimi: “Xəyal etməyə azadıq”.