"Maksimum xal üçün mübarizə aparacağıq" – MÜSAHİBƏ

Misli Premyer Liqasının 13-cü turunda “Qarabağ” evdə “Karvan-Yevlax”ı 2:0 hesabı ilə məğlub etdi.

Görüşdən sonra Ağdam təmsilçisinin hücumçusu Musa Qurbanlı Sport1.az-ın suallarını cavablandırdı...

- Qazandığınız 3 xalı necə şərh edərdiniz?

- Təbii ki, asan oyun olmadı, özünüz də gördünüz. Əsas odur ki, üç xalı qazandıq. Bizim üçün qalibiyyət vacib idi. Rəqib çox yaxşı və kompakt müdafiə olunurdu. Bütün fikirləri müdafiə olunmaq idi. Bu mənada, hücum qurmaq, təhlükəli epizodlar yaratmaq çətin idi. Çünki boşluqlar vermirdilər. Amma sonda lazım olan qolları vurduq və qalib gəldik.

- İlk hissədə komandanız hesabı aça bilmədi. Rəqibin müdafiə xəttini keçə bilməməyiniz onların yaxşı müdafiə olunması ilə bağlı idi, yoxsa “Qarabağ”ın aparıcı oyunçuların ehtiyatda oturması rol oynadı?

- Rəqibin kompakt müdafiə olunmasını deyərdim.

- Qısa qrafikdə üç oyun oynayacaqsınız, çünki kubok görüşü, ardınca liqa və daha sonra Çempionlar Liqası matçına çıxacaqsınız. Sıx qrafikə görə heyəti yetərli hesab edirsinizmi?

- Bəli, məncə yetərlidir. Kifayət qədər futbolçumuz var. Düzdür, hər halda, çətinlik, yorğunluq olacaq. Bu da normal haldır. Amma hamımız burada komandamız üçün əlimizdən gələni edirik. Neçə futbolçu olsa da, meydana kim çıxsa da, hamımız burada komandamız üçün can qoyur. Düşünürəm ki, bəs edəcək. Çətin olsa da, çalışarıq həll edək, öhdəsindən gələk.

- Çempionlar Liqasında “Qarabağ”ın 7 xalı var, “Ayaks”ın isə xalı yoxdur. Bunu komandanız üçün üstünlük hesab edirsiniz?

- Belə turnirlərdə, belə komandalara qarşı nəsə üstünlükdən danışmaq bir qədər yaxşı fikir deyil. Rəqibləri onsuz da görürük, dünya səviyyəli komandalardır. ÇL-də oynayırıq. Hər matça ciddi hazırlaşacağıq, maksimum xal üçün mübarizə aparacağıq. Sona qədər oynayacağıq.

- Pley-off şanslarınızı necə dəyərləndirirsiniz?

- Təbii ki, müəyyən şansımız var. Çalışacağıq ki, bu şansdan istifadə edək. Əlimizdən gələni edəcəyik ki, yaxşı nəticə qazanaq.

- “Ayaks”, “Ayntraxt” və “Liverpul”la üç oyundan neçə xal qazana bilərsiniz?

- Vallah, oturub hesablamamışam. Maksimum çalışacağıq da, nə qədər bacarsaq, o qədər də xal qazanaq.

ZƏFƏR HACILI