"İstefa barədə yəqin ki, rəhbərlik qərar verəcək" – Azər Həşimov

“Karvan–Yevlax” Misli Premyer Liqasının 12-ci turunda evdə “Kəpəz”ə 1:2 hesabı ilə uduzub.

Sport1.az xəbər verir ki, qarşılaşmadan sonra meydan sahiblərinin baş məşqçisi Azər Həşimov mətbuat konfransında jurnalistlərin suallarını cavablandırıb.

- İkinci dövrənin ilk oyunu idi. Öz azarkeşlərimizin qarşısında qələbə qazanmaq istəyirdik. Çox təəsüf ki, məğlub olduq. Qarşıda 21 tur var, heç nə bitməyib. Güman edirəm ki, "Karvan-Yevlax" Premyer Liqada qalacaq.

- Azarkeşlər oyunun sonunda sizi istefaya çağırdılar. Buna münasibətiniz necədir?

- İstefa məsələsi futbolda var. Bu barədə yəqin ki, rəhbərlik qərar verəcək. Hələ ki heç nə deyə bilmərəm.

- Vüsal Məsimovu əvəzləmək istədiz, amma o meydandan çıxmadı. Məşqçilər korpusu 25 yaşlı futbolçuya sözünü keçirə bilmirsə, digər oyunçulara necə keçirə bilər?

- "Araz-Naxçıvan"la oyunda Vüsalın zədəsi var idi. Bu gün özü köməkçilərimə demişdi ki, əvəzetmə olsun. Sonra dedi ki, yaxşıyam, dəyişməyin.

- Sizin dediklərinizlə meydanda gördüklərimiz üst-üstə düşmür. Həmin epizoddan bir neçə dəqiqə sonra Vüsal texniki zonaya yaxınlaşıb "mən çıxmayacam" dedi...

- İnanın ki, o sözü mənə deməyib. Vüsalın əvəzetmə istəməsini də mənə köməkçilər demişdilər. Ona görə anlaşılmazlıq oldu. Yüz faiz əmin olun. Heç bir problem yoxdur.

- "Kəpəz" Premyer Liqada qalmaq mübarizəsində əsas rəqibinizdir. Bununla belə Yevlax şəhər stadionunda onların oynamasına razılıq verilib. Bu nə dərəcədə düzgündür?

- Buna mən qərar verməmişəm. Rəhbərliyə aid olan sualdır. Suala cavab verə bilmərəm.

- Sizcə, bu gün niyə uduzduz?

- Penalti epizodunda futbolçular bir az diqqətsiz yanaşdılar. Rəqibin də, bizim də qol imkanlarımız oldu.

- "Kəpəz", "Karvan-Yevlax" və "Qəbələ" Premyer Liqanı tərk etməyə namizədlər kimi görünür. Sizcə, bu üç komandanın içində zəif bənd kimdir?

- Bu mövsüm mənim Premyer Liqada debütümdur. Bizim çətinliklərimiz çox olub. Deyərdim ki, hamısının şəraiti bizdən yaxşı olub. Meydança problemimiz var idi. İki həftədir burada məşq edirik. Pərdə arxasında görünməyən o qədər problem var ki. Hamı səhvi məşqçidə görür.

- Doğma meydanda məğlubiyyətlər davam etdikcə təzyiq çox olacaq. Bu haqda nə deyə bilərsiniz?

- Bu, futbolun bir hissəsidir. Mətbuat da, azarkeşlər də təzyiq edə bilər. Təzyiqdən çıxacağıq və daha yaxşı olacağıq.