Adil Şükürov yenə "Kəpəz"ə problem yaradır - 18 min manatlıq söhbət

"Kəpəz" rəhbərliyi canını Adil Şükürovdan tam qurtara bilməyib.

Sport1.az-a daxil olan məlumata görə, mütəxəssis Gəncə təmsilçisi AFFA-ya şikayət etməyə hazırlaşır.

Buna səbəb klubun Adil Şükürovla təzminat məsələsini razılaşdırmadan Azər Bağırovu baş məşqçi kimi təqdim etməsi olub.

Tərəflər bir neçə gün öncə bir araya gəliblər. "Kəpəz" rəhbərliyi Adil Şükürova özünün və korpusunda yer alan məşqçilərin 4 aylıq maaşını təklif edib. Mütəxəssis bununla razılaşmayıb. O, ən azı 6 aylıq ödənişi qəbul edəcəyini bildirib. Gəncə təmsilçisinin rəhbərliyi isə bu məbləği ödəmək istəmir.

Maraq üçün bildirək ki, Adil Şükürovun müqaviləsində aylıq əməkhaqqı 9 min manat göstərilib. Yəni, baş məşqçi "Kəpəz"dən 54 min manat tələb edir. Gəncə təmsilçisi isə 36 min manat ödəməklə məsələni həll etmək niyyətindədir.

Məsələ ilə bağlı hər iki tərəfin fikirlərini işıqlandırmağa hazırıq.