Ter Ştegen əməliyyat olunacaq

"Barselona"nın futbolçusu Mark-Andre ter Ştegen belindən əməliyyat olunacaq.

Sport1.az xəbər verir ki, bu barədə almaniyalı qapıçının özü sosial şəbəkələrində paylaşım edib.

33 yaşlı oyunçu bildirib ki, o, uzun müddət belində ağrılar hiss edir. Bu qərar Kataloniya klubunun tibbi heyəti və digər mütəxəssislərlə müzakirə etdikdən sonra qəbul olunub. Ter Ştegen keçirəcəyi əməliyyatdan sonra 3 ay müddətində bərpa prosesi keçəcək.

Qeyd edək ki, daha öncə mətbuatda yayılan xəbərlərə əsasən, zədə ter Ştegenin bu yay "Barselona"dan ayrılmasına da əngəl olub. Lakin o, 2026-cı il dünya çempionatında Almaniya millisində əsas qapıçı mövqeyini qazanmaq üçün qarşıdakı qış transfer dönəmində yeni klub axtarışına başlaya bilər.