Ruslan Əmircanov: "Qarabağ" hər iki rəqibi üstələyir" - AÇIQLAMA

Tezliklə klublarımızın avrokubok macəraları başlayacaq.

"Qarabağ" Çempionlar Liqasının II təsnifat mərhələsində "Şelburn' - "Linfild" cütünün qalibi ilə qarşılaşacaq.

Avropa Liqasında "Sabah" iştirak edəcək. Bakı təmsilçisi I təsnifat mərhələsində "Çelye" ilə üz-üzə gələcək.

Konfrans Liqasında isə 2 kollektivimiz iştirak edəcək. "Zirə" "Hayduk"la, "Araz-Naxçıvan" isə "Aris"lə qarşılaşacaq.

Kollektivlərimizdən hansı mərhələ keçməyə borcludur? Hansı təmsilçimiz avrokuboklarda uğurlu olacaq?

Suallarımızı veteran futbolçu Ruslan Əmircanova ünvanladıq. Mütəxəssis Sport1.az-a açıqlamasında bunları söylədi:

“Hazırda Avropada futbol çox sürətlə inkişaf edir. Ona görə də əvvəlcədən hansı komandanın uğur qazanacağını əminliklə demək olur. “Qarabağ” illərdir bizi o qədər sevindirib ki, onlardan həmişə qələbə gözləyirik. “Şelburn” – “Linfild” cütünün qalibi ilə qarşılaşacaq komandamızdan hamı zəfər gözləyir. “Qarabağ” təcrübəsinə görə hər iki klubu üstələyir. Lakin ilk oyunlar həmişə çətin keçir. Ağdamlılar ehtiyatlı oynamalı, bacardıqca az səhvlərə yol verməlidirlər. Çünki Britaniya təmsilçiləri səvhlərdən, boşluqlardan maksimum istifadə edir və qapanırlar.

“Sabah” ın rəqibi barədə ətraflı nəsə deyə bilməyəcəm. Çünki oyunlarını izləməmişəm. Onların ötən mövsüm Konfrans Liqasında yaxşı mübarizə apardıqlarından xəbərdaram. Zənnimcə, “Sabah” zəruri mövqelərə yaxşı transferlər həyata keçirsə, yeni baş məşqçi də qısa zamanda futbol fəlsəfəsini komandaya aşılaya bilsə, Masazır təmsilçisi sloveniyalıları büdrədə və mərhələ keçə bilər.

“Zirə” nin rəqibinə gəlincə, “Hayduk” Xorvatiyada güclülər dəstəsini 3-cü pillədə tamamlasa da, onlar çempiondan cəmi 2 xal geri qaldılar. Bu göstərici Split təmsilçisinin yalnız adı, təcrübəsindən deyil, həm də istəkliliyindən xəbər verir. “Qartallar” üçün ağır sınaq olacaq, amma son iki mövsümə nəzər yetirsək, Rəşad Sadıqovun komandası mübarizlik sərgiləyərək mükafatçılar sırasına düşməyi bacarır. Onlara güvənməli və dəstək olmalıyıq.

“Araz-Naxçıvan” ilk dəfə avrokubokda debüt edəcək. Elmar Baxşıyev Muxtar Respublika təmsilçisində döyüşkən kollektiv yarada bilib. Çoxlarının gözləmədiyi halda, o, komandasını mükafatçılar sırasına daşıya bildi. Naxçıvanlıların rəqibi “Aris” mövsümü 5-ci pillədə başa vurub. Yunanıstan təmsilçiləri avrokuboklarda əzmkarlıq, xarakter sərgiləyirlər. Elə “Aris”in də kifayət qədər təcrübəsi var. Hazırda naxçıvanlılar cəbhəsində əsas məsələ gedənlərin yerinə gələnlər boşluqları nə dərəcə dolduracaq və baş məşqçinin prinsip-tələblərini qısa müddətə mənimsə bilib-bilməməkləri ilə bağlıdır. Bununla yanaşı, pessimizmə qapılmaq lazım deyil. Elmar müəllimin necə tələbkar və nəticə verən mütəxəssis oldunu bilirik. O, son saniyəyə kimi yetirmələrinə döyüşəməyi aşılayacaq.

Klublarımızın hər birinin bəxtinə çətin rəqiblər düşsə də, onların xarakter göstərib ilk mərhələni keçəcəklərinə inanıram”.

MİRZƏ S.