Tofiq Bəhramov adına Ticarət Mərkəzi - YAZI

Tofiq Bəhramov adına Respublika stadionu. Azərbaycan futbolunun məbədi. Millinin, "Neftçi"nin, "Qarabağ"ın ev oyunlarının keçirildiyi yer. Yüz minlərlə insanın futbol izlədiyi məkan.

Bazar ertəsi bir həmkarımla stadionun ərazisində yerləşən restoranda görüşməli idik. ADA universitetinin qarşısındakı girişdən maşınla arenaya daxil oldum. Çoxları bilir ki, həmin yerdə avtomobili saxlamaq üçün yer var. Stadion ətrafında işim olanda çox vaxt maşını orada saxlayıram. Bu dəfə belə olmadı. Həmin ərazidə parklama nişanı var idi. Yəni, orada maşın saxlamaq pullu idi. Düşündüm ki, normaldır. Boş ərazidir. Niyə də oyun və tədbir olmayan günlərdə buradan xeyir götürülməsin?

Yoluma davam edərək maşını restoranın qarşısında saxladım. Hansı ki, orada ödənişli parklanma nişanı yoxdur. Təqribən 2-3 saatdan sonra arenanı tərk etmək cəhdim baş tutmadı. Mühafizəçi dedi ki, dayanacağın ödənişini etməlisən. Amma dayanacaqdan istifadə etməmişdim. Maşını əyləşdiyimiz restoranın qarşısında saxlamışdım. Nə üçün ödəniş etməli idim?

Mühafizəçi məsələni belə izah etdi:

"Artıq stadionun ərazisinə girən zaman sizin avtomobilin nömrəsi qeydə alınır. Çıxış zamanı azparkinq proqramı və ya nağd şəkildə ödəniş etməlisiniz".

Əlim üzümdə qaldı. Yəni, stadiona girdinsə, pul verməlisən. Tofiq Bəhramova dostlarınla futbol oynamaq üçün getdinsə, həm meydança üçün, həm də parklanmaya ödəniş etməlisən. Dövlətə, Azərbaycan vətəndaşına məxsus məkanı ediblər biznes mərkəzi.

Əla ideyadır. Təklif edirəm ki, arenanın adını da dəyişsinlər. Lazım deyil Tofiq Bəhramov adına Respublika stadionu. Qoy olsun, Tofiq Bəhramov adına Ticarət Mərkəzi. Onsuz da ayda bir dəfə orada futbol olur. Geniş ərazidir. Gətirsinlər Türkiyədən, Çindən pal-paltar. Gedək alış-verişimizi edək...

İLKİN SULTANLI