AMF-in ilk, Rəşad Sadıqovun növbəti avtoqolu - KÖŞƏ

Dünən Azərbaycan Minifutbol Federasiyasının təşkilatçılığı ilə ölkə futbolunun əfsanələri arasında matç keçirildi.

"Neftçi 2000-lər" adlı kollektivlə "Premyer Liqa məşqçiləri" üz-üzə gəldi. Adlara baxanda adamın ürəyi açılırdı. Bir tərəfdə Zaur Tağızadə, Mahmud Qurbanov, Rəşad Abdullayev, Hüseyn Məhəmmədov, Mahir Şükürov, Tərlan Əhmədov, Rəşad Sadiqov, Bəxtiyar Musayev, Samir Əliyev, Samir Ələkbərov, Vidadi Rzayev, Emin Quliyev, Rail Məlikov, Ruslan Abışov, digər tərəfdə isə Qurban Qurbanov, Samir Abasov, Rəşad Sadıqov, Müşfiq Hüseynov, Ayxan Abbasov, Fərhad Vəliyev, Elvin Məmmədov, Əfran İsmayılov, Elçin Rəhmanov, Vaqif Cavadov, Yunis Hüseynov, Elmar Baxşıyev, Azər Bağırov kimi keçmişin və indinin ulduzları yer almışdı. Afişa adama "gəl-gəl" deyirdi. Bu oyunu izləmək üçün Milli Gimnastika Arenasına getməyə həvəsli idim. Amma həvəsim qursağımda qaldı.

Təşkilatçılıqda edilən bəzi nöqsanlara görə oyuna gedə bilmədim. Matçın başlamasına 1 saat qalmış xəbər tutdum ki, görüşü jurnalist olaraq izləmək üçün akkreditasiyadan keçmək lazım imiş. Amma 2 gün öncə verilən elanda buna ehtiyacın olmadığı bildirilmişdi. Qapıda qalmamaq üçün arenaya getməkdən imtina etdim. Hətta orada olan əməkdaşımıza dedim ki, get evə.

Nə isə! Belə şeylər zaman itkisidir. Mənim üçün də vaxt önəmli məfhumdur. Keçək əsas məsələyə!

Matçı TV-dən izlədim. Mənə çatmadı ki, azərbaycanlıların meydanda olduğu qarşılaşmada heyətlər təqdim olunanda niyə ad və soyadlar ingiliscə yazılmışdı? Rəsmi dilimizi dəyişmişik? Yoxsa yayımın efir rejissoru azərbaycanlı deyildi?

Necə olur ki, girişi pulsuz olan matça 9 min azarkeş gəlmir? Azərbaycanın ən məşhur futbol simalarının iştirak etdiyi oyun heç kimə maraqlı deyildi? Demək ki, təkcə feysbuka reklam qoymaqla təşkilatçılıq olmur. Düzgün strategiya ilə bu görüşə hətta bilet də satmaq olardı. Yaxşı ki, "Neftçi"yə görə "Forza Neftçi" gəlmişdi. Oyuna rəng qatdılar.

Nə isə. Görüşün əsas vaxtında hesab 1:1 oldu. Penaltilər seriyasında Rəşad Sadıqov son zərbəni dəqiq yerinə yetirərək "Premyer Liqa məşqçiləri"nə qələbə qazandırdı. "Zirə"nin çalışdırıcısı da oyun bitən kimi həmin qolu instaqramda paylaşaraq futbolçuları - Qismət Alıyevi, Məqsəd İsayevi, Ceyhun Nuriyevi və Fuad Bayramovu işarələdi. Yəni ki, penaltini belə vurarlar. Buna nə gərək var idi? Sadıqov hələ də "Zirə"nin Avropa Liqasında "Şerif"ə məğlubiyyətini unutmur? Axı həmin oyunda günahkar yerli uşaqlar deyildilər. Salifu Suma boşuna qırmızı vərəqə almasaydı, heç penaltilər seriyası da olmazdı.

Yox e, vacib oyunlardan öncə: "Penaltilər seriyasına hazırsınız?, - deyə sual verəndə, "buna hazırlaşmırıq", - cavabını verirsiniz. Onda penaltini necə vurmağın lazım olduğunu yerli uşaqlara məşqdə başa salın, instaqramda yox.

Rəşad Sadıqov futbolçu olanda dəfələrlə səhvlər edib. Həm milli komandanın, həm də "Qarabağ"ın heyətində dəfələrlə avtoqol müəllifi olub. Buna görə tənqid atəşinə tutulub. Hətta səhvlərinə görə bir çoxları tələb edirdi ki, o, karyerasını bitirsin.

Rəşad futbolçu ikən Qurban Qurbanov və ya yığmanın çalışdırıcıları onun dünən etdiyini etsəydilər, qladiatora necə təsir edərdi? Yəqin ki, xoşuna gəlməzdi.

İLKİN SULTANLI