"VAR-a arxayın olub, qərar verə bilmirlər"

"Mançester Yunayted"in əfsanəvi futbolçusu Ueyn Runi İngiltərə hakimlərini tənqid edib.

Sport1.az xəbər verir ki, sabiq hücumçu öz podkastında İngiltərə Kubokunun 4-cü mərhələsində keçirilən "Aston Villa" - "Nyukasl" matçındakı hakim idarəçiliyi məsələsinə toxunub.

Həmin görüşdə baş hakim Kris Kavananın bir sıra səhvlərə yol verməsi müzakirələrə səbəb olmuşdu. Runinin sözlərinə görə, Premyer Liqa hakimləri VAR texnologiyasına həddindən artıq öyrəşdikləri üçün, bu sistemin olmadığı kubok oyunlarında çətinlik çəkirlər:

"Düşünürəm ki, hakimlərdə VAR-dan həddindən artıq asılılıq yaranıb. Təəssüf ki, onlar artıq kənardan kömək almağa öyrəşiblər. VAR onları dəfələrlə xilas edib, buna görə də qərar vermək üçün sadəcə bu sistemin müdaxiləsini gözləyirlər".

Runi bildirib ki, müstəqil qərar vermək qabiliyyəti azalıb:

"VAR olmayanda onlar qərarı özləri verməlidirlər. Amma (oyundankənar vəziyyət zamanı) bayrağı qaldırmamağa o qədər öyrəşiblər ki, dünənki səhvlər də məhz bundan qaynaqlandı. Heç kim inkar etmir ki, onların işi çox çətindir, amma VAR olmayanda bu cür problemlər ortaya çıxır".