“Neftçi”nin ulduzu bu kluba keçə bilər

Kamerunlu hücumçu Vensan Abubakar karyerasını Qazaxıstanda davam etdirə bilər.

Sport1.az-ın əldə etdiyi məlumata görə, təcrübəli forvard “Aktobe”nin maraq dairəsinə düşüb və tərəflər arasında mümkün transfer variantı nəzərdən keçirilir.

Futbolçunun transfer qiyməti təxminən 700 min avro göstərilir.

Abubakar vaxtilə “Portu”, “Beşiktaş”, “Əl-Nəsr”, “Loryan” və “Hatayspor”da forma geyinib. Hazırda “Neftçi”nin üzvü olan hücumçu son qarşılaşmalarda əsas heyətdə yer almır. O, bir neçə oyunda ehtiyatdan meydana çıxıb, son matçda isə ümumiyyətlə şans qazanmayıb.

Qeyd edək ki, bu mövsüm Bakı təmsilçisində 12 matça çıxan oyunçu 6 dəfə rəqib qapılarına yol tapıp və 1 məhsuldar ötürmə ilə yadda qala bilib.

NİHAT KƏRİMLİ