AFFA "Şamaxı" - "Qarabağ" matçında hakimin səhvə yol verdiyini AÇIQLADI - VİDEO
AFFA Hakimlər Komitəsi Misli Premyer Liqasının XIX turunda keçirilən “Şamaxı” – “Qarabağ” oyunu ilə bağlı epizodu dəyərləndirib.
Sport1.az xəbər verir ki, qarşılaşmanın son dəqiqələrində baş verən qayda pozuntusunda baş hakim Kamal Umudlu yanlış qərar verib. Belə ki, Bəhlulun artırma dəqiqələrdə etdiyi kobud müdaxilə intizam sanksiyası tələb etsə də, referi futbolçuya kart göstərməyib. Halbuki oyunçu artıq sarı vərəqə ilə cəzalı idi və epizod ikinci xəbərdarlıqla qırmızı vərəqə ilə nəticələnməli idi.
Qeyd edək ki, matçın VAR hakimi Kamranbəy Rəhimov, AVAR isə Eyyub İbrahimov olub. Görüş Şamaxı şəhər stadionunda baş tutub. İdarəçiliyi hakim-inspektor Munis Abdullayev, AFFA nümayəndəsi kimi isə Yavər Rəhimov həyata keçirib.
Hakimlər Komitəsi bunun referinin texniki-intizam səhvi olduğunu bildirib. İntizam tədbirləri ilə bağlı qərarın yaxın günlərdə açıqlanacağı gözlənilir.
Xatırladaq ki, matç Ağdam təmsilçisinin qələbəsi ilə başa çatıb - 1:2.
NİHAT KƏRİMLİ
