"İmişli"nin yeni transferi "Kəpəz"lə görüşdə məyus olub - MÜSAHİBƏ

Misli Premyer Liqasının 19-cu turunda “İmişli” “Kəpəz”lə qolsuz bərabərə qaldı – 0:0.

Qarşılaşmadan sonra “pambıqçılar”ın üzvü Dieqo Kardozu Sport1.az-ın suallarını cavablandırdı...

Həmin müsahibəni təqdim edirik...

– "İmişli"nin heyətində ilk rəsmi oyununu keçirdin. Qarşılaşma ilə bağlı nə deyə bilərsən?

– Əlbəttə ki, hamımız qalib gəlmək istəyirdik. Komandama kömək etməyə çalışdım, əlimdən gələni etdim. İndi isə bütün diqqətimizi növbəti oyuna hazırlaşmağa yönəltmişik.

– Baş məşqçiniz Jorj Kaşkilya portuqaliyalıdır. "İmişli"yə gəlməyində onun təsiri oldu?

– Çempionatın rəqabətli olmağından məlumatım var idi. Baş məşqçinin portuqaliyalı olması prosesi daha da sürətləndirdi. Bu çempionatda oynamaq istəyi məndə var idi. "İmişli"də özümü göstərmək niyyətindəyəm.

– Qarşına qoyduğun məqsəd nədir?

– Əsas hədəfim komandaya kömək etməkdir. Tez zamanda adaptasiya olmaq və qısa müddətdə komandaya kömək olmaq istəyirəm. Hər oyuna qələbə qazanmaq məqsədi ilə meydana çıxırıq.

-- İkinci hissədə bir epizodda əlverişli mövqedə olsan da, ötürmə verdin. Həmin an qapıya zərbə vurmaq daha doğru qərar olmazdı?

– Bu, oyun epizodu idi. Komanda yoldaşımı daha əlverişli mövqedə gördüm. Bu səbəbdən ötürmə etmək qərarına gəldim. Oyunun sonuna qədər qapıya zərbə endirə bilmədiyim üçün bir az məyus oldum.

– Azarkeşlərin səndən gözləntiləri var. Onlara nə demək istəyirsən?

– Komanda olaraq meydanın hər qarışı uğrunda mübarizə aparırıq. Hər oyuna qələbə qazanmaq məqsədi ilə çıxırıq. Azarkeşlərin dəstəyi bizim üçün çox önəmlidir. Onları oyunlarımıza dəvət edir, dəstək olmağa çağırıram.

MƏHƏMMƏD HÜSEYNOV